PALITRA
  Gündəlik online qəzet
10.10.2019 | 15:38:00 | Sosial şəbəkədə paylaş:

Azərbaycan Milli Elmlər Akademiyasının (AMEA) Elm Tarixi İnstitutu 16 oktyabr 2019-cu il tarixdə, saat 12:00-da İnstitutun Akt zalında "Bakı Dövlət Universitetinin tarixi" kitabının təqdimatını keçirəcək.
Kitab Elm Tarixi İnstitutunun elmi şurasının qərarına əsasən çap olunub. Kitabın müəllifləri – tarix üzrə fəlsəfə doktorları Ziyad Əmrahov və Samir İsmayılovdur. Kitabın redaktoru və "Ön söz" ün müəllifi AMEA Elm Tarixi İnstitutunun direktoru, tarix elmləri doktoru Məryəm Seyidbəylidir.
Bakı Dövlət Universitetinin yaradılmasının 100 illiyinə həsr edilmiş tədqiqat əsərində Azərbaycanda Avropa tipli ilk ali təhsil ocağının yaradılması ilə bağlı Azərbaycan Xalq Cümhuriyyəti hökumətinin atdığı addımlar, Universitetin Bakıda yaradılması ilə bağlı AXC Parlamentində aparılmış gərgin müzakirələr, Parlament fraksiyalarının BDU-nun açılıb-açılmaması ilə bağlı mövqeləri, Parlamentin Universitetlə bağlı çıxardığı qanun layihəsi, Universitetin 1920-ci il aprel işğalından sonrakı fəaliyyəti, Azərbaycan Müvəqqəti İnqilab Komitəsi və Azərbaycan SSR Xalq Maarif Komissarlığının universitetlə bağlı dekretləri, Universitetdə fakültə quruculuğu, Bakı Dövlət Universitetinin adının 1922-ci ildə dəyişdirilməsi, Azərbaycan Dövlət Universitetinə çevrilməsi, 1924-cü ildə bolşevik lideri V.İ.Leninin adının Universitetə verilməsi, 1930-cu ildə Bakı Dövlət Universitetinin fəaliyyətinin dayandırılması və onun bazasında yeni-yeni ali təhsil müəssisələrinin açılması, 1934-cü ildə Universitetin fəaliyyətinin yenidən bərpa edilməsi, 1939-cu ildə ildə Universitetə S.M.Kirovun adının verilməsi, Universitetdə pedaqoji kadr hazırlığı, SSRİ-nin dağılması ərəfəsində Azərbaycanda gedən ictimai-siyasi proseslərdə Bakı Dövlət Universitetinin tələbə və müəllim kollektivinin iştirakı, 1989-cu ildə Azərbaycan ziyalılarının tələbə ilə Bakı Dövlət Universitetinin tarixi adının bərpa olunması və Universitetə Azərbaycanın görkəmli dövlət və ictimai xadimi, Azərbaycan Xalq Cümhuriyyətinin yaradılması və Bakı Dövlət Universiteti ilə bağlı müzakirələrdə əvəzsiz xidmətlər göstərmiş dahi lider M.Ə.Rəsulzadənin adının verilməsi, eləcə də 1990-cı ildən müasir dövrə kimi Bakı Dövlət Universitetinin fəaliyyəti ilk dəfə olaraq Azərbaycan Respublikası Dövlət Arxivi, Bakı Dövlət Universitetinin Arxivi və Azərbaycan Respublikası Prezidentinin İşlər İdarəsinin Siyasi Sənədlər Arxivinin sənədləri əsasında araşdırılaraq oxuculara təqdim olunur!


Xəbər 227 dəfə oxundu

Ana səhifə