“Lalə Şövkətlə Əli Kərimli bir azdan bir-birilərinə qarşı daha aqressiv davranacaqlar”
Tarix: 04.09.2013 | Saat: 19:23:00 | E-mail | Çapa göndər


Mais Səfərli: “Milli şura” adlı batan gəmidən daha tez qaçmaq üçün yarışa giriblər”

Son günlərdə baş verənlər göstərdi ki, ənənəvi müxalifətin seçkilərlə bağlı ortaya çıxardığı “milli şura”nın deqradasiyası keyfiyyətcə yeni mərhələyə qədəm qoyub. Belə ki, əvvəllər bu quruma yedək kimi qoşulan qruplar qurumdakı autsayder vəziyyətlərindən narazı qalıb oranı tərk edirdilərsə, indi artıq “milli şura”nın qurucuları olan əsas partiya və şəxslər də qurumu boykota başlayıblar. Belə ki, əvvəllər “milli şura” “fədai”si kimi çıxış edən El hərəkatının sədri Eldar Namazov, ACP lideri Rəsul Quliyev, eləcə də KXCP sədri Mirmahmud Mirəlioğlu faktiki olaraq “milli şura”dan çıxmaqdadırlar. Onlar “milli şura”nın sessiyalarını bütün tərəfdarları ilə birlikdə boykot edirlər. Son sessiyanı isə ALP boykot edib. “Milli şura”nın dünənki sessiyasında Liberal Partiyasının sədri Əvəz Temirxan və ALP üzvləri qurumun sessiyasına qatılmayıb. Bildirilir ki, ALP üzvlərinin “milli şura”nın sessiyasını boykot etməsinə AXCP sədri Əli Kərimli səbəb olub.

“Bir azdan Əli Kərimli ilə İsa Qəmbər və sair tərəflər arasında da bu cür kompromat savaşları başlayacaq və mərəkə qopacaq”

Belə ki, əvvəlcədən razılaşdırılmış qaydalara görə, hər sessiyaya bir partiyanın rəhbəri sədrlik etməli idi. Bu sıralama ilə isə Cəmil Həsənlinin vahid namizəd elan edildiyi 23 avqust sessiyasına sədrlik etmək növbəsi ALP sədrinin olub. Lakin AXCP sədri Əli Kərimli həmin vaxt bu məsələyə etiraz edərək, sessiyanın kifayət qədər ciddi olduğunu, C.Həsənlinin yeni vahid namizəd elan olunacağını nəzərə alaraq, iclasa müxalifətdə daha ağır çəkili bir partiya rəhbərinin sədrlik etməsinin doğru olduğunu bildirib. Ona görə də 23 avqust sessiyasına Müsavat başqanı İsa Qəmbər sədrlik edib. ALP Əli Kərimlinin bu təşəbbüsünə etiraz etsə də, sonda vəziyyətlə barışmalı olub. Hətta dünənki sessiyada da sədrlik növbəsi Ə.Temirxanın olsa da, sessiyaya 1 saat qalmış məlum olub ki, ALP-nin sədrliyi yenə alınmayacaq. Bu isə ALP-nin sessiyasını boykot qərarı verməsinə səbəb olub.
Qeyd etmək lazımdır ki, ALP-yə və onun lideri Lalə Şövkətə qarşı Əli Kərimli tərəfindən yaradılan əngəllər təsadüfi və birinci dəfə deyil. Xatırladaq ki, bu iki ənənəvi müxalifət başçısı arasında köhnə umu-küsülər, kəskin ziddiyyətlər və ədavət var. Hələ 2005-ci il seçkilərindən əvvəl də bu iki şəxsin bir qurumda təmsil olunmasına həmin kəskin ziddiyyətlər və ədavətlər mane olmuşdu. Vaxtilə Əli Kərimli nəzarətində olan qəzet vasitəsilə Lalə Şövkətə qarşı ittihamedici və aşağılayıcı yazılar yazdırır, qara piar kampaniyası aparırdı. Lalə Şövkətsə buna görə Kərimlini nəzərdə tutaraq bildirmişdi: “Hər şalvar geyinən kişi olmur”. Bu ziddiyyətlər təbii ki, bir müddət latent formada getsə də, hazırda “milli şura”nın sürətlə süquta uğraması fonunda yenidən üzə çıxır.
“Palitra”ya bu barədə fikirlərini bildirən Yurddaş Partiyasının sədri Mais Səfərli qeyd etdi ki, əvvəlcədən bəlli idi ki, “milli şura” nə müxalifətə, nə də cəmiyyətə heç nə verməyəcək. Çünki birincisi, “milli şura”nı yaradan şəxslər cəmiyyətdə nüfuzu və dəstəyi olmayan, tanınmayan və yaxud adları nəhs məsələlərdə hallananlar idi. Bu da onu təmin etdi ki, “milli şura” cəmiyyət tərəfindən dəstəklənməsin. Sonrakı proseslər də bunu açıq göstərdi. İndi isə uğursuzluqlardan yoğrulan “milli şura”nı tərk edənlərin sayı durmadan artır. Orada faktiki olaraq hələki Müsavat və AXCP qalıb. Bu isə faktiki o deməkdir ki, “milli şura” əslində elə “ictimai palata”nın başqa bir adıdır. Yəni orada elə bu “ictimai palata”da bir-birini didən iki qurum qaldı. Bunun da səbəbi “milli şura”ya daxil olan qurumlar arasındakı köhnə ziddiyyətlərlə bağlıdır. Bu ziddiyyətlər hələ aradan qalxmayıb. Ən başlıcası isə həmin quruma daxil olan təşkilatların başçıları artıq dərk edirlər ki, “milli şura”da heç bir perspektiv yoxdur. Əvvəlcə düşərgədə çoxları növbəyə düzülüb “milli şura”ya yazılırdılar. Elə bilirdilər ki, guya hakimiyyətə gələcəklər. Düşünürdülər ki, pay alacaqlar. Artıq Rüstəm İbrahimbəyovun oyunlarının paxırı açıldı, alternativ namizədin məcburi irəli sürülməsi və sair onlara göstərdi ki, “milli şura” siyasi səhnədən çıxmaqdadır. Ona görə də “milli şura” adlı batan gəmidən daha tez qaçmaqla bağlı yarışa giriblər. Mən hesab edirəm ki, onlar çox gözəl dərk edirlər ki, “milli şura”nın havası çoxdan çalınıb. Orada qalmağı daha vaxt itkisi hesab edirlər. Ona görə də sessiyalarını boykot edirlər”.

“Onların hər biri partiyadaşları qarşısında uğursuzluğa görə hesabat verməlidir. Bu hesabatda heç biri özlərini doğrulda bilməyəcək, ona görə də bəhanə rəqib başçının hər şeydə günahkar olmasını, xəyanətkarlığını sübut etməyə girişməkdə qalır”

Lalə Şövkətlə Əli Kərimlinin bir azdan bir-birilərinə qarşı daha sərt və aqressiv davranacaqları da gözləniləndir. Bunu deyən M.Səfərli düşünür ki, bir azdan Əli Kərimli ilə İsa Qəmbər və sair tərəflər arasında da bu cür kompromat savaşları başlayacaq və mərəkə qopacaq: “Onlar bir azdan daha amansız davalaşacaqlar. Seçki uğursuzluğu onları bir-birinə salışdıracaq. Onların hər biri partiyadaşları qarşısında uğursuzluğa görə hesabat verməlidir. Bu hesabatda heç biri özlərini doğrulda bilməyəcək, ona görə də bəhanə rəqib başçının hər şeydə günahkar olmasını, xəyanətkarlığını sübut etməyə girişməkdə qalır”.
Müxalifətin uğursuzluqlarının əsl səbəbləri isə M.Səfərlinin fikrincə, bu cür didişmələr və intriqalardan əlavə, müxalif başçıların yeni dövrdə siyasi fəaliyyətlə məşğul olmaq üçün təfəkkür və beyin baxımından yararsız olduqları, cəmiyyətə yeni mesajlar ötürə bilməməsi, yalançı olmaları, siyasi liderlik keyfiyyətlərinə malik olmamaları və sairdir.

İlkin AĞAYEV




 
Bölməyə aid digər xəbərlər
21.09.2018
Cüdo üzrə dünya çempionatının açılış mərasimi keçirilib
21.09.2018
Ədliyyə naziri Ağstafada vətəndaşları qəbul edib
21.09.2018
Sumqayıtın ən innovativ startap layihələri bəlli oldu
21.09.2018
Ramin Quluzadə Qazaxda vətəndaşlarla görüşüb
21.09.2018
Leysan yağacaq, dolu düşəcək

Şərh əlavə olunmayıb



    ,    
Mehriban Nəsib
Araz Hüseyn
Fuad HÜSEYNZADƏ
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10130

1 Ötən tədris ilində Bakı Atatürk Liseyinin 36 məzunu dünyanın müxtəlif universitetlərinin tələbəsi adını qazanıb
2 “Bu il sığorta bazarı 40 faizdən çox genişlənib, yığımlar artıb”
3 Krivoy Roqdakı soydaşlarımız festivala hazırlaşırlar
4 “Türkiyə və Azərbaycanla yaxın münasibətlər quran Rusiya Ermənistanın maraqlarına heç bir məhəl qoymur”
5 QHT sədri Ukraynadakı “Qafqaz“ xalq rəqs ansamblına milli geyimlər hədiyyə edib


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info