Okeanın o tayından püskürən qərəz
Tarix: 28.10.2013 | Saat: 22:38:00 | E-mail | Çapa göndər


Bu qərəz Azərbaycan xalqının mövqeyinə, seçiminə və iradəsinə qara yaxmağa çalışsa da, çox cılız və aşırı ifşaolunandır...
Azərbaycanda keçirilən prezident seçkilərində xalq öz iradəsini sərbəst və şəffaf bir şəkildə ortaya qoydu: seçicilərin 84 faizindən çoxu İlham Əliyevə səs verdi və növbəti 5 il ərzində də sabit, milli və müstəqil inkişafa, iqtisadi və sosial rifaha, əmin-amanlığa “hə” dedi. Azərbaycanda seçkilər çox yüksək standartlara uyğun və ətraf ölkələrə, hətta Avropa dövlətlərinin çoxuna nümunə ola biləcək səviyyədə keçirildi. Əbəs yerə deyil ki, nüfuzlu beynəlxalq təşkilatlar, çoxsaylı xarici müşahidə missiyaları, ekspertlər, yerli və xarici QHT-lər sözügedən seçkiləri müsbət qiymətləndirdilər. Avropa Şurası Parlament Assambleyası, ATƏT Parlament Assambleyası, Müstəqil Dövlətlər Birliyi, Asiya Siyasi Partiyalarının Beynəlxalq Konfransı, İslam Əməkdaşlıq Təşkilatı və digər nüfuzlu beynəlxalq təşkilatların, həmçinin müxtəlif dövlətləri təmsil edən 1400-dən artıq müşahidəçinin yekun və yekdil rəyi ondan ibarət oldu ki, seçkilər demokratik, şəffaf, ədalətli və obyektiv keçirilib.
Amma çox təəssüf ki, ATƏT-in qısamüddətli müşahidə missiyasının, bu qurumun parlament assambleyasının müşahidə qrupunun, habelə AŞPA-nın rəyinin əksinə olaraq bir qrup ATƏT-in uzunmüddətli müşahidəçiləri Azərbaycana qarşı müəyyən xarici dairələrin mövqeyini ifadə edən qərəzlə çıxış etdilər. Onlar seçkidə guya pozuntular olduğu barədə “hesabat” hazırladılar. Bunun dərhal ardınca ABŞ Dövlət Departamenti ölkəmizdə keçirilən seçki ilə bağlı qərəzli çıxışa başladı. Dövlət Departamenti sırf geopolitik maraqlardan irəli gələrək və bundan doğan qeyri-obyektivliklə çıxış edərək seçkilərin guya beynəlxalq standartlara cavab vermədiyi barədə bəyanat yaydı. Halbuki ABŞ-ı təmsil edən nüfuzlu siyasətçilər, ABŞ təşkilatlarının nümayəndələri də seçkiləri müşahidə etmiş və bu proseslərlə bağlı müsbət rəyini ifadə etmişdi. Yaxud cəmi bir il öncə ABŞ-da keçirilən prezident seçkilərində obyektivliyə şübhə ilə yanaşıldığından və etimad göstərilmədiyindən bəzi ştatlarda seçki məntəqələrinə buraxılmayan ATƏT-in Demokratik Təsisatlar və İnsan Haqları bürosunun müşahidəçiləri Dövlət Departamenti üçün birdən-birə etalon olub? Buradan da açıq görünür ki, bu seçkiləri gözdən salmaq, onun guya beynəlxalq standartlara cavab vermədiyi haqqında dünyada rəy formalaşdırmaq müəyyən xarici qüvvələrin maraq dairəsinə daxildir. Azərbaycanın müstəqil milli inkişafı və iqtisadi gücü ilə yanaşı siyasi intibahının olduqca qabarması kimlərəsə sərf etmir. “Milli şura” adlı antimilli müxalif qurumla və erməni lobbisi ilə sıx əlaqədə olan həmin xarici dairələr beynəlxalq aləm tərəfindən seçkilərə verilən yüksək qiyməti həzm edə bilmir və indi də Avropa Parlamenti, Avropa Şurası, ATƏT Parlament Assambleyasına təzyiq göstərir, onların rəyini dəyişdirməyə çalışırlar. Onlar elə bilirdilər ki, göstərişlərinə əsasən, bütün Avropa qurumları Azərbaycanı tənqid hədəfinə çevirəcəklər. Amma arzuları ürəyində qaldı. Əksinə, bütün beynəlxalq müşahidəçilər seçkilərin yüksək səviyyədə təşkilini, aşkarlıq və şəffaflıq şəraitində keçdiyini, xalqımızın iradəsini tam əks etdirdiyini söylədilər. Onlar təbii ki, bu məsələdə nüfuzlu beynəlxalq qurumların mövqeyinə təsir və təzyiq göstərə bilmədilər. Bəzi nüansları çıxmaq şərtilə. Məsələn, dünyada seçki praktikasında ilk dəfə Avropanın birgə müşahidə missiyasının rəyi kəskin şəkildə bizdəki seçki ilə bağlı haçalandı. AŞPA və Avropa Parlamentinin simasında iki nüfuzlu Avropa qurumu ayrıca tədbir keçirərək pozitiv bəyanat yaydı. ATƏT PA və bu qurumun qısamüddətli müşahidə missiyası ATƏT DTİHB-nin rəyi ilə razılaşmadıqlarını bəyan etdilər. Bu, həmin rəyin əsl müəlliflərinə qarşı çağırış və onların reputasiyasına ağır zərbə idi. Əsl oyun da bundan sonra başladı. ABŞ açıq şəkildə nüfuzlu Avropa təsisatlarına, ayrı-ayrı ölkələrə barmaq hiddətlənməyə, hədələrə başladı. Nəticədə Avropa Parlamentində şou təşkil olundu və AP özü-özünü təkzib edəcək səviyyədə qeyri-səmimilik, qeyri-obyektivlik nümayiş etdirdi. Avropa Parlamentinin plenar sessiyasında “lazımi” qətnamə qəbul etdirdikdən sonra indi də Avropa Şurası ilə müvafiq “iş” aparılır. Təsadüfi deyil ki, ABŞ-ın ATƏT-dəki daimi nümayəndəliyi Azərbaycanda keçirilmiş prezident seçkiləri ilə əlaqədar Avropa Şurasının baş katibi Torbörn Yaqlanda müraciət ünvanlayıb və AŞPA müşahidə missiyasının rəyindən narahatlığını ifadə edərək ona bir daha bu məsələdə ABŞ-ın mövqeyini xatırladıb.
Nəticə də özünü çox gözlətmədi. Verilən məlumata görə, AŞPA Daimi Komitəsinin noyabrın 22-də Vyanada keçiriləcək iclasında Azərbaycandakı seçkilərin müzakirəyə çıxarılacağı gözlənilir.
Azərbaycanda seçkiləri müşahidə edən mindən artıq xarici ekspertə qarşı qarayaxma kampaniyasına start verilib. Onların ofisləri, evləri qarşısında etiraz aksiyaları təşkil olunur, elektron poçt ünvanlarına tənqid və təhqir dolu məktublar göndərilir, haqlarında mənfi rəy formalaşdırılır. Üstəlik, Azərbaycan Prezidentini inamlı qələbəsi münasibətilə təbrik edən bəzi nüfuzlu şəxslər də bu qüvvələrin hədəfinə çevrilir. Məsələn, guya Fransada yaşayan bir qrup azərbaycanlı mühacir tərəfindən Kann şəhərinin meri, Fransa Milli Assambleyasının deputatı Bernard Broşana, Şabil şəhərinin meri, Fransanın Burqundiya regionunun Yon vilayətinin Ali Şurasının birinci vitse-prezidenti Patrik Gendrauda, həmin vilayətin Ali Şurasının prezidenti Andre Vilyeyə ünvanlanmış təzyiq xarakterli məktubu da bu qəbildəndir.
Bütün bunlar bir daha təsdiq edir ki, müxtəlif ölkələrdə demokratiyanın səviyyəsi müəyyən qüvvələrin maraqları prizmasından qiymətləndirilir. Hadisələrin gedişi belə deməyə əsas verir ki, ATƏT, Avropa Parlamenti ABŞ-ın güclü təsirinə məruz qalıb. Onlar okeanın o tayından gələn tapşırıqları icra etmək dərəcəsinə düşüblər. ABŞ-ın bu barədə göstərişləri ilə razılaşmayanlar isə tənqid və hədələrə məruz qalır. Əlbəttə dünyada müəyyən təsir gücü olan antiazərbaycan dairələr ölkəmizin hüdudlarından kənarda kimlərinsə rəyini, mövqeyini dəyişə bilər, amma onlar Azərbaycan xalqının mövqeyinə, iradəsinə əl qoya bilməzlər. Çünki seçkidə xalq öz sözünü dedi və nəticədə öz iradəsinə və simpatiyasına uyğun olaraq öz Prezidentini özü seçdi. Bu isə onu göstərir ki, xarici qüvvələrin köməyi ilə bəzi antimilli ünsürlərin, xalqa yox, xarici dairələrə bel bağlayan, onların əlaltılarına çevrilmək üçün bütün gedişləri təcrübədən keçirən qrupların hakimiyyətə gəlmək şansları çoxdan ölüb. Çünki xalqımız bu cür proseslərin mahiyyətinə yaxşı bələddir. İnsanlarımızın siyasi dünyagörüşü və vətənpərvərlik düşüncəsi heç vaxt onların mənafeyinə zidd olan xarici antimilli dairələrin köməyilə marionet ünsürlərin hakimiyyət kürsüsünə çıxmasına imkan verməz...
İlkin AĞAYEV




 
Bölməyə aid digər xəbərlər
19.03.2019
TÜRKPA Katibliyində Novruz bayramı münasibətilə tədbir keçirilib
19.03.2019
Fond yaranmasının 10-cu ildönümü və Novruz bayramı münasibətilə təntənəli mərasim təşkil edib
18.03.2019
Əfv sərəncamlarının verilməsi humanizm, əxlaqi və cəmiyyətdaxili harmoniyanın qorunması baxımından böyük önəm daşıyır
18.03.2019
Əfv sərəncamı respublikamızın humanizm prinsipləri əsasında inkişaf yolu seçdiyini bir daha nümayiş etdirdi
18.03.2019
Millət vəkili: Əfv sərəncamı ümumi ictimai həmrəylik baxımından da əlamətdar hadisəyə çevrildi

Şərh əlavə olunmayıb

    ,    
Namiq Əliyev
Tural Tağıyev
Namiq Əliyev
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10698

1 Akademik Ramiz Mehdiyev tariximizin xanlıqlar dövrünə sənədlər işığında nəzər salır
2 Təhsilə qoyulan sərmayə gələcəkdə yüksək potensiala malik savadlı gənclərin yetişməsini təmin edəcək
3 Elektromaqnitizmin müxtəlif sahələrinə mühüm töhfələr verən görkəmli azərbaycanlı alim
4 “Kaspersky Password Manager” proqramının yeni versiyası şifrənin təhlükəsizliyini yoxlayır
5 “Sondakika.com”: “Apreldən TANAP-ın Avropaya təbii qaz göndərəcək hissəsində sınaqlara başlanacaq”


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info