Cəsur döyüşçü
Tarix: 13.01.2014 | Saat: 19:32:00 | E-mail | Çapa göndər


Məmmədov Malik Bəhmən oğlu 1972-ci ildə Qafan rayonunun Yuxarı Gödəkli kəndində anadan olub. 1990-cı ildə hərbi xidmətə çağırılıb. Uzaq Samara vilayətində 1 il 6 ay qulluq etdikdən sonra erməni quldurlarının Azərbaycan torpaqlarına təcavüzü Malikdə hiddət doğurur, düşməndən qisas almaq üçün, çətinliklə də olsa, uzaq Samaradan qaçıb Azərbaycana gəlməyə nail olur. Bu, torpaqlarımız uğrunda gedən müharibənin şiddətləndiyi dövr idi.
Malik Azərbaycan torpaqlarını azğın düşmən caynağından xilas etmək üçün 1992-ci ilin aprel ayında könüllü olaraq cəbhəyə yola düşdü. İlk döyüşə Füzuli bölgəsindən başladı. Füzulinin Qacar, Divanlılar və başqa kəndləri uğrunda gedən döyüşlərdə fəallıq göstərib düşmənə ağır zərbələr vurdu. Döyüş bacarığına görə onu taqım komandirinin müavini təyin etdilər.
Həmin vaxt Malikin qulluq etdiyi tabor Məngələnata yüksəkliyini quldurlardan təmizləyir. Bu döyüşdə Malik düşmənin 1 ədəd “PK” pulemyotunu və döyüş sursatını ələ keçirir. Hərbi hissəyə qayıdarkən, qəflətən minaya toxunub ayağından və çənəsindən yaralanır. Buna baxmayaraq, ələ keçirdiyi silahları gətirib tabor kamandirinə təhvil verir. Malik müalicə olunmaq üçün hospitala göndərilir. Bakı hospitalında müalicə olunduqdan sonra, 1993-cü ilin dekabr ayında yenidən cəbhə bölgəsinə qayıdır.
Cəbhənin ən qaynar nöqtəsinə, Füzuli rayonuna qayıdan Malik rayonun Kürdmahmudlu, Şükürbəyli, Bəhmənli, Seyidəhmədli, Alxanlı kəndlərinin düşməndən təmizlənməsində böyük hünər göstərib. Bu döyüşlərdə Malik düşmənin bir neçə canlı qüvvəsini və texnikasını məhv edib. Cəbhə dostlarının söylədiklərinə görə, Malik dəstənin önündə getməyi xoşlayırdı və şəxsi igidlik göstərmədən geri dönmürdü.
1994-ci il yanvar ayının 13-ü Malikin axırıncı döyüş günü oldu. Həmin gün, Malikin qulluq etdiyi tabor Aşağı Əbdülrəhmanlı kəndini düşməndən azad etmək üçün hücuma keçdi. Gecədən başlayan döyüş səhərə yaxın daha da şiddətləndi. Səhər xeyli itki verən düşmən Əbdülrəhmanlı kəndini tərk etdi. Malikin dəstəsi qaçan düşməni təqib edib 8 kilometr geriyə qovdu. Malik təkbaşına 12 düşməni və düşmənin 2 snayperini məhv etdi. Üçüncü snayperi vurmaq üçün irəliyə atıldı. Lakin bu zaman mənfur düşmən gülləsi Malikin başından dəydi. Malik son dəfə cəbhə yoldaşlarının üzünə baxıb, canından çox sevdiyi Vətən üçün son nəfəsini verdi.
Cəsur döyüşçü 1994-cü il yanvarın 14-də Şəhidlər Xiyabanında dəfn olundu. Ölümündən sonra döyüşlərdə göstərdiyi igidlik və şücaətinə görə Bakının Nərimanov rayonundakı küçələrdən birinə Malik Məmmədovun adı verildi. Həmçinin “Azərbaycan Respublikası Silahlı Qüvvələrinin hərbi qulluqçularının təltif edilməsi haqqında” Azərbaycan Respublikası Prezidentinin 24 iyun 2010-cu il sərəncamı ilə Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissənin qarşısında qoyulmuş tapşırıqları yerinə yetirərkən fərqləndiyinə görə baş çavuş Məmmədov Malik Bəhmən oğlu “Hərbi xidmətlərə görə” medalı ilə təltif olunub.




 
Bölməyə aid digər xəbərlər
24.09.2018
Səyyar ASAN xidmət davam edir
24.09.2018
Leyla Əliyeva “Beynəlxalq Sülh Günü”nə həsr olunmuş tədbirə qatılıb
23.09.2018
Səkkiz ayda hər bir sakin 554,5 manatlıq ödənişli xidmətlərdən istifadə edib
21.09.2018
Bakı metropoliteni tarixinin ən böyük sosial layihəsinə start verilir
20.09.2018
Ağdamda keçirilən əmək yarmarkasında 75 nəfərə işə göndəriş verilib

Şərh əlavə olunmayıb



    ,    
Mehriban Nəsib
Araz Hüseyn
Fuad HÜSEYNZADƏ
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10136

1 Ötən tədris ilində Bakı Atatürk Liseyinin 36 məzunu dünyanın müxtəlif universitetlərinin tələbəsi adını qazanıb
2 “Bu il sığorta bazarı 40 faizdən çox genişlənib, yığımlar artıb”
3 Krivoy Roqdakı soydaşlarımız festivala hazırlaşırlar
4 Yalnızlıq qorxusu
5 “Türkiyə və Azərbaycanla yaxın münasibətlər quran Rusiya Ermənistanın maraqlarına heç bir məhəl qoymur”


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info