“Ölkəniz Avropa və Asiyaya töhfə verə bilən regional gücə çevrilib”
Tarix: 01.04.2014 | Saat: 15:57:00 | E-mail | Çapa göndər


Xose Manuel Qarsia-Marqalyo: “Azərbaycanın beynəlxalq ticarət perspektivləri durmadan artır”

İspaniyanın xarici işlər naziri Xose Manuel Qarsia-Marqalyo Azərbaycana rəsmi səfəri öncəsi “Trend”ə müsahibə verib.

- Bu sizin İspaniyanın xarici işlər naziri kimi Azərbaycana ilk səfərinizdir. Səfər zamanı Azərbaycan rəhbərliyi ilə görüşlərdə hansı prioritet məsələlər müzakirə olunacaq?

- Bəli, bu Azərbaycana ilk səfərimdir. Bu mənim gündəliyimdə olan məsələ idi, belə ki, bizim ikitərəfli əlaqələrimiz çox yaxşıdır və iqtisadi, ticarət və mədəni sahələrdə həmin əlaqələri təkmilləşdirmək üçün geniş imkanlar var. Bizim prioritetlərimizə İspaniya və Azərbaycanın bir-birinə təklif etdiyi, xüsusilə də ticarət sahəsində imkanlardan mümkün qədər çox yararlanaraq ikitərəfli əlaqələrin genişləndirilməsi daxildir.

- İspaniya və Azərbaycan arasında ikitərəfli siyasi, ticarət, iqtisadi və humanitar əlaqələrin hazırkı səviyyəsini necə qiymətləndirirsiniz?

- Təəssüf ki, hazırda iqtisadi əlaqələrimiz hər iki ölkənin iqtisadiyyatının potensialına cavab vermir. Bu səbəbdən də səfərimizin məqsədlərindən biri ikitərəfli ticarət və investisiya sahələrində əlaqələrimizin bundan sonra da inkişafı üçün müvafiq bazarlarımızın mövcud potensialından istifadə yollarını birgə araşdırmaqdır. Bir sıra İspaniya şirkətləri fəaliyyət göstərdikləri sahələrdə, məsələn, infrastruktur və bərpa olunan enerji sektorunda liderdirlər və onlar Azərbaycanın iqtisadi inkişafına müsbət töhfə verə bilərlər. Eyni zamanda, Azərbaycanın İspaniyaya sərmayə yatırması üçün maraqlı imkanlar mövcuddur.

- İspaniyanın Ermənistan-Azərbaycan, Dağlıq Qarabağ münaqişəsi ilə bağlı mövqeyi nədən ibarətdir?


- İspaniya Cənubi Qafqazın siyasi cəhətdən stabil olmasında və iqtisadi baxımdan çiçəklənməsində maraqlıdır. Dağlıq Qarabağ məsələsinə gəldikdə, biz ATƏT-in Minsk qrupunun həmsədrlərinin fəaliyyətini qətiyyətlə dəstəkləyirik. Münaqişənin beynəlxalq hüquq çərçivəsində danışıqlar yolu ilə həlli, bütün maraqlı tərəflərin sadiqliyi regionda sülh, sabitlik və barışığa gətirib çıxara bilər.

- Azərbaycanla əməkdaşlığa böyük önəm verərək, İspaniya hökuməti Azərbaycanda səfirlik açmaq qərarına gəlib. Hazırda bu məsələ hansı mərhələdədir? Səfirliyin nə zaman açılması gözlənilir?

- Biz Azərbaycanı Cənubi Qafqazda aparıcı ölkə hesab edirik və buna görə də səfirliyin açılması üçün ilk addım kimi Avropa İttifaqının Bakı nümayəndəliyi yanında İspaniyanın diplomatik missiyasını açmaq qərarına gəldik. Büdcə şərtləri imkan verən kimi, səfirlik də açacağıq. Şübhəsiz, bizim istəyimiz qısa müddətdə Azərbaycanda səfirlik açmaqdır.

- Avropanın enerji təhlükəsizliyinin təmin olunmasında Azərbaycanın rolunu necə qiymətləndirirsiniz?

- Biz öz enerji sərvətinə və coğrafi mövqeyinə görə Azərbaycanın oynaya biləcəyi aparıcı roldan xəbərdarıq. Bu, ölkənizə Aİ ilə enerji təchizatı və enerji təhlükəsizliyi sahəsində əməkdaşlıq üçün geniş imkanlar vəd edir. Həqiqətən də bu əməkdaşlıq Avropa İttifaqı və Azərbaycanın gündəliyindəki ən mühüm məsələlərdən biridir.
Avropa enerji bazarının təhlükəsizliyi və səmərəliliyinin təmin edilməsi üçün bir çox mühüm tapşırıqlar görülməlidir. Təchizat məsələsinə gəldikdə isə üç əsas məsələni sadalamaq istərdim - enerji mənbələri, enerji təchizatı mənbələri və nəql marşrutları. Bunların hər üçü diversifikasiyaya aiddir. Hər üç sahədə Azərbaycan çox mühüm rol oynaya bilər. Qeyd edim ki, bu üç aspekt üzrə bizim əməkdaşlığımız qarşılıqlı faydalı olacaq.

- Azərbaycan artıq bir neçə ildir ki, alternativ enerji sahəsində işləyir və İspaniya bu sahədə böyük təcrübəyə malikdir. İspaniya öz təcrübəsini Azərbaycanla bölüşməyə hazırdırmı? Siz bu sahədə Azərbaycan və İspaniya şirkətləri arasında əməkdaşlığın perspektivlərini necə dəyərləndirirsiniz?

- İspaniya bərpa olunan enerji sahəsində dünya lideridir. Bu mənada İspaniya hökuməti tam əmindir ki, hər iki ölkənin enerji potensialını artırmaq üçün çox yaxın gələcəkdə İspaniya və Azərbaycan arasında yaxşı əməkdaşlığın şahidi olacaq.

- Azərbaycan şirkətləri xarici ölkələrə fəal sərmayə yatırırlar. İspaniya Azərbaycan sərmayəsində maraqlıdırmı?

- Azərbaycanın beynəlxalq ticarət perspektivləri durmadan artır. Ölkəniz təkcə öz regionuna deyil, həmçinin Avropa və Asiyaya töhfə verə bilən regional gücə çevrilib. Əlbəttə, bizim ölkəmiz də bura daxildir. İspaniya Azərbaycanla geniş ticarət əlaqələri qurmaq və hər iki istiqamətdə investisiyaların həcmini artırmaq niyyətindədir. Bizim üçün hər iki ölkənin şirkətlərinin bir-birinin bazarları ilə tanış olması çox vacibdir.




 
Bölməyə aid digər xəbərlər
19.02.2019
Moskvada Azərbaycanın Rusiyadakı səfirinin Çeçenistanın məsul nümayəndələri ilə görüşü olub
19.02.2019
YAP Pirallahı rayon təşkilatı sədrinin 2018-ci ilin yekunlarına və qarşıda duran vəzifələrə dair hesabatı
19.02.2019
İqtidarın qazandığı hər bir uğur müxalifətin siyasi iflasını sürətləndirir
19.02.2019
Fərid Şəfiyev Beynəlxalq Münasibətlərin Təhlili Mərkəzinin sədri təyin edildi - səfir vəzifəsindən geri çağırıldı
18.02.2019
İbrahim Öztek: “Xocalı soyqırımı nankor bir cəmiyyətin xəyanətkar hücumunun son halqasıdır”

Şərh əlavə olunmayıb

    ,    
Namiq Əliyev
Namiq Əliyev
Fuad HÜSEYNZADƏ
Tural Tağıyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10605

1 “Gürcüstanda yaşayan gürcü və azərbaycanlı gənclərin mütəmadi görüşlər keçirməsi vacib şərtdir”
2 Milli qəhrəmanlara və şəxsiyyətlərə hücum savaşın tərkib hissəsidir
3 “Əsas oxucu kütləsi sayılan gənclər bu gün internet mediaya daha çox üstünlük verirlər”
4 Qabaqcıl texnologiyalar dövründə ənənəvi və internet medianın inkişafı
5 ABŞ-da atışma: xəsarət alanlar var


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info