Azərbaycan parlamentinin nümayəndə heyəti Koreya Respublikasında səfərdə olub
Tarix: 10.04.2014 | Saat: 19:43:00 | E-mail | Çapa göndər


Xəbər verdiyimiz kimi, Azərbaycan Respublikası Milli Məclisi sədrinin birinci müavini Ziyafət Əsgərovun başçılığı ilə parlament nümayəndə heyəti Koreya Respublikasında səfərdə olub.
Azərbaycan nümayəndə heyətinin Koreya Respublikası Milli Assambleyasının sədri Kanq Çanq-hi ilə görüşündə ölkələrimiz arasında münasibətlərin hazırki vəziyyətinə və inkişaf perspektivlərinə dair fikir mübadiləsi aparılıb. Qeyd olunub ki, ölkələrimiz coğrafi cəhətdən bir-birindən uzaqda yerləşməsinə baxmayaraq son 20 ildə yaxşı münasibətlər formalaşıb, hər iki tərəf siyasi, iqtisadi, mədəni və digər sahələrdə əlaqələrin inkişafı üçün səylər göstərir. Ölkələrimiz arasında diplomatik münasibətlər yaranandan sonra müxtəlif sahələrə aid bir neçə sənəd imzalanıb, beləliklə əlaqələrimizin hüquq-müqavilə bazası formalaşdırılıb.
Vurğulanıb ki, Azərbaycan Respublikası ilə Koreya Respublikası arasında münasibətlərin möhkəmlənməsində yüksək səviyyəli səfərlərin, xüsusilə dövlət başçılarının səfərlərinin xüsusi rolu olub.
Tərəflər iki ölkənin münasibətlərinin inkişafında parlamentlərarası əlaqələrin əhəmiyyətini vurğulayaraq, bu istiqamətdə əməkdaşlığı genişləndirməyin qarşılıqlı faydalı olacağına əminlik ifadə ediblər.
Koreya tərəfinə Prezident İlham Əliyevin rəhbərliyi ilə dinamik inkişaf edən Azərbaycanın son illər qazandığı uğurlar, həyata keçirilən irimiqyaslı enerji, nəqliyyat, infrastruktur layihələri barədə məlumat verilib. Bildirilib ki, Azərbaycan Respublikası hazırda Cənubi Qafqazın lider dövləti kimi regionda xüsusi rol oynayır.
Görüşdə Ermənistan-Azərbaycan, Dağlıq Qarabağ münaqişəsindən söz açılıb, BMT Təhlükəsizlik Şurasının münaqişənin həlli ilə bağlı qəbul etdiyi 4 qətnamənin, habelə Avropa Parlamentinin, AŞPA-nın, İslam Əməkdaşlıq Təşkilatının və digər beynəlxalq qurumların qərarlarından irəli gələn tələblərin işğalçı Ermənistan tərəfindən yerinə yetirilməməsi təəssüflə qeyd edilib.
Milli Məclis sədrinin birinci müavini Ziyafət Əsgərovun Koreya Respublikasının baş naziri Çunq Honq-von ilə görüşündə ölkələrimiz arasında münasibətlərin inkişafına, iqtisadi sahədə əməkdaşlığın vəziyyətinə, yeni sərmayə imkanlarına dair müzakirələr aparılıb. Bildirilib ki, Azərbaycandakı əlverişli biznes və sərmayə mühitindən yararlanan bir neçə Koreya şirkəti ölkəmizdə uğurlu layihələr həyata keçirir. Bununla yanaşı, son illər iqtisadi inkişaf nəticəsində maliyyə imkanları genişlənən Azərbaycan xarici ölkələrə fəal sərmayə yatırmağa başlayıb. Elə bu yaxınlarda Azərbaycanın Koreya Respublikasının paytaxtı Seul şəhərinin daşınmaz əmlak sektoruna 450 milyon ABŞ dollarına yaxın sərmayə yatırması da ölkələrimizin iqtisadi sahədə münasibətlərində yeni bir istiqamət yaradıb.
Azərbaycan nümayəndə heyətinin Koreya Respublikası Milli Assambleyasının sədri müavini Park Byonq-sokun və Milli Assambleyanın Koreya-Azərbaycan parlamentlərarası dostluq qrupunun üzvləri, Seul şəhərinin vitse-meri Kim Sanq-bum ilə görüşlərində iki ölkə arasında münasibətlərin hazırki səviyyəsindən məmnunluq ifadə olunub, bu cür qarşılıqlı səfərlərin ikitərəfli əlaqələrin inkişafındakı rolu vurğulanıb. Qeyd olunub ki, ölkələrimiz arasında münasibətlərin inkişafında parlamentlərarası əməkdaşlığın əhəmiyyəti böyükdür. Bu istiqamətdə dostluq qruplarının üzərinə böyük vəzifə düşür.
Nümayəndə heyətinin Koreya Respublikasının ədliyyə naziri Hvanq Kyo-an ilə görüşündə isə ölkələrimizin hüquq sahəsində mümkün əməkdaşlıq imkanları nəzərdən keçirilib. Qarşı tərəf Azərbaycan məhkəmə-hüquq, ədliyyə sistemində həyata keçirilən islahatlar barədə məlumatlandırılıb, bu sahədə qanunvericiliyinin təkmilləşdirildiyi bildirilib.
Ziyafət Əsgərovun başçılıq etdiyi nümayəndə heyəti Koreya Respublikası Milli Assambleyasının iclas zalı, deputatların fəaliyyəti üçün yaradılmış iş şəraiti ilə tanış olub.
Bundan başqa, nümayəndə heyəti Seul Milli Xiyabanını ziyarət edərək, Koreyanın azadlığı və suverenliyi uğrunda həlak olanların xatirəsini ucaldılmış abidənin önünə əklil qoyub. Ziyafət Əsgərov Milli Xiyabanın xatirə kitabına ürək sözlərini yazıb.
Milli Məclis sədrinin birinci müavini Ziyafət Əsgərov Koreyanın nüfuzlu “Joongang Daily” qəzetinə müsahibəsində ulu öndər Heydər Əliyevin əsasını qoyduğu siyasi kursun Prezident İlham Əliyev tərəfindən uğurla davam etdirilməsi nəticəsində Azərbaycanın dinamik inkişafından danışıb. Qeyd edib ki, regionun lider dövləti olan Azərbaycanın beynəlxalq aləmdə nüfuzu artıb. Ölkəmiz beynəlxalq hüququn təməl prinsiplərinə əsaslanan xarici siyasət kursu yürüdür.
Qeyd edək ki, nümayəndə heyətinin tərkibinə Milli Məclisin Azərbaycan-Koreya parlamentlərarası əlaqələr üzrə işçi qrupunun sədri Malik Həsənov, qrupun üzvləri Rauf Əliyev, Rüstəm Xəlilov, İmamverdi İsmayılov və Sədaqət Vəliyeva daxil idi. Azərbaycanın Koreya Respublikasındakı müvəqqəti işlər vəkili Rəmzi Teymurov, Xarici İşlər Nazirliyinin Şərqi və Mərkəzi Asiya şöbələrinin müdiri Vaqif Cəfərov nümayəndə heyətini müşayiət ediblər.
Təhminə




 
Bölməyə aid digər xəbərlər
20.11.2018
Prezident İlham Əliyev: Azərbaycan üçün Belarus mehriban dost və etibarlı tərəfdaşdır
20.11.2018
Azərbaycan və Belarus arasında hərbi-texniki əməkdaşlığın kifayət qədər böyük həcmləri və genişlənməyə yaxşı meyli var
20.11.2018
Belarus və Azərbaycan həmişə etibarlı və strateji tərəfdaş olaraq qalacaqlar
19.11.2018
Qanunsuz aksiyalar heç bir ölkədə məqbul sayılmır
19.11.2018
Bu tarixi bilmək lazımdır və ya keçmişin dərsləri

Şərh əlavə olunmayıb



    ,    
Namiq Əliyev
Tural Tağıyev
Namiq Əliyev
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10500

1 “Xaricdə təhsilimi davam etdirsəm, psixologiya sahəsini seçəcəyəm”
2 Davamli dil siyasəti dövlətin əsas prioritet istiqaməti kimi
3 “Gedir dayanmadan zamanın köçü”
4 Rufiz Qonaqov: Bako Saakyanın Fransaya qanunsuz səfəri Minsk qrupunun həmsədri olan bu ölkə üçün qara ləkədir
5 Almaniyada Naxçıvanla bağlı broşürlər paylanılıb


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info