“Azadlıq” qəzeti faşizmin dəstəkçisi rolunda
Tarix: 16.05.2015 | Saat: 02:21:00 | E-mail | Çapa göndər


Müharibə, Əmək və Silahli Qüvvələr Veteranları Təşkilatı: “Azadlıq” qəzeti 700 min azərbaycanlının əziz xatirəsini və ləyaqətini kobud şəkildə təhqir edib”

Azərbaycan Respublikası Müharibə, Əmək və Silahli Qüvvələr Veteranları Təşkilatının Rəyasət Heyəti mayın 13-də “Azadlıq” qəzetində dərc edilmiş yazı ilə bağlı bəyanat yayıb: “Prezident İlham Əliyevin Böyük Vətən müharibəsində qələbənin 70 illiyi münasibətilə azərbaycanlı veteranlarla görüşü zamanı bəşəriyyəti məhv olma təhlükəsi ilə üz-üzə qoyan faşizm, irqi ayrı-seçkiliyin yeni təzahürü olan neofaşizm haqqında fikirlərini bildirərək, narahatlığını çatdırması və bu ideologiyanı özünün dövlət siyasətinə çevirmiş Ermənistanın mövqeyini ifşa etməsi "Azadlıq" qəzetinin hiddətinə səbəb olub.
Qəzetin 13 may 2015-ci il tarixli buraxılışında mövzu ilə əlaqədar dərc edilmiş yazıda cılız məqsədlərə xidmət edən müəyyən fikirlər irəli sürülmüş, faşizm birbaşa, Ermənistan isə dolayı yolla müdafiə edilmişdir. Əslində, "Azadlıq" qəzetinin bu səpgili davranışı bizdə təəccüb doğurmur. Məhz bu qəzetin ideoloqları hakimiyyətə gələr-gəlməz, 9 May Qələbə Gününü bayram günləri siyahısından çıxarmış, böyük və şərəfli bir tarix səhifəsinin üzərindən nadanlıqla xətt çəkmişdilər. Bu dövrdə biz veteranlar öz orden və medallarımızı taxmağa qorxur, ikinci dərəcəli vətəndaş kimi ögey münasibətə məruz qalırdıq. Böyük Vətən müharibəsinin alovlandığı ucsuz-bucaqsız cəbhə xəttinin hər qarışında əzmlə döyüşən və qələbə çalan azərbaycanlı döyüşçülərindən fərqli olaraq, məlum illərdə Azərbaycana rəhbərlik edən və 9 May - Qələbə Gününü tarixdən silən "Azadlıq aşiqləri" vətənin ərazi bütövlüyünü qorumaqda acizlik göstərdilər. O dövr Azərbaycan üçün böyük məğlubiyyətlərlə yadda qaldı. Bəlkə də onların qələbə günlərinə antipatiyasının səbəbini elə məhz burada axtarmaq lazımdır.
Böyük Vətən müharibəsində əldə edilmiş qələbəni, ümumiyyətlə, faşizmə qarşı mübarizəni gərəksiz sayan yazı müəllifi faşistlərin heç bir soyqırıma imza atmadıqlarını, Hitlerin Bakı ilə bağlı heç bir qərəzli planının olmadığını iddia edir. Faşızmdə humanizm meyilləri axtaran müəllifin fikirincə, bəşəriyyət üçün zərərli olan bu ideologiyanın tənqid edilməsi ədalətli deyil. Maraqlıdır, görəsən, 57 milyon hərbçinin, 25 milyon mülki əhalinin, 6 milyon yəhudinin soyqırıma uğraması ilə nəticələnən İkinci Dünya müharibəsini kimlər başlamışdı və bu müharibə hansı ideologiyaya xidmət edirdi? Belarusiyanın Xatın kəndini külə çevirərək, kənd əhalisinə qarşı qanlı qətliamı kim törətmişdi? Bakını işğal etmək üçün "Edelveys" planını kim hazırlamışdı? Görəsən, bu antiazərbaycan ruhlu yazının müəlifi çox da uzaq olmayan tarixi keçmişdən bu qədərmi xəbərsizdir?
Hitler Bakı haqqında fikirlərini bu cür ifadə edirdi: "Bakının tarixi missiyası Alamaniya üçün yanacaq çəni rolunu oynamasındadır". Onun planına görə, Bakı 1941-ci ilin sonlarına qədər işğal edilməli, SS-çilər Bakıda qərargah qurmalı idilər. Xatırladaq ki, Hitler ordusunun keçdiyi hər yerdən işgəncə ilə öldürülmüş insanların cəsədləri, məhv edilmiş mədəniyyət binaları, yandırılmış şəhər və kəndlər boylanırdı. Bəli, o dövrdə Azərbaycanı, xüsusən də öz neft mədənləri ilə imperialist güclərin iştahını qabardan Bakını Sovet Ordusu qorudu. Onun da tərkibində azərbaycanlılar bütün Sovet İttifaqını, o cümlədən doğma Azərbaycanı qoruyurdular. Bəhs olunan yazıda Böyük Vətən müharibəsinin rusların müharibəsi kimi qələmə verilməsini müəllifin növbəti təhrifi kimi qiymətləndiririk. Böyük Vətən müharibəsi təkcə rusların yox, müttəfiq 15 respublikanın müharibəsi idi. Azərbaycan döyüşçüləri bu müharibədə öz vətənlərini, doğma yurd-yuvalarını qorumaq üçün düşmənlə çarpışırdılar. Eyni zamanda, Azərbaycan döyüşçülərinin misilsiz igidlikləri və qəhrəmanlıqları faşist Almaniyasının məğlubiyyətini sürətləndirərək, dünyada sülhün və sabitliyin bərqərar olmasında əhəmiyyətli rol oynamışdır. Biz, Azərbaycan Respublikası Müharibə, Əmək və Silahli Qüvvələr Veteranları Təşkilatı olaraq bildirmək istəyirik ki, vətənin ağır günlərində canı və qanı bahasına döyüşdən-döyüşə atılaraq ölkəni qoruyan veteranlardan fərqli olaraq, "Azadlıq" qəzetinin himayə etdiyi "ictimai xadimlər" erməni əqidədaşları ilə müntəzəm surətdə görüşlər keçirir, dövlətimizin müstəqil inkişafının qarşısında maneəyə çevrilməyə cəhd edərək, düşmənlə eyni səngərə girməkdən belə çəkinmirlər. Bu haqda faktlar kifayət qədərdir...
Bu məsələ ilə bağlı biz də ölkə ictimaiyyətinin qınağına qoşulur, "Azadlıq" qəzetini düşmən dəyirmanına su tökməkdən vaz keçməyə çağırırq. Ümummilli məsələlərdə milli mövqedən çıxış etmək əvəzinə, Ermənistan və digər antiazərbaycan qüvvələrlə həmrəylik nümayiş etdirən "Azadlıq" qəzeti Böyük Vətən müharibəsinin tarixi əhəmiyyətinə kölgə salmağa cəhd edərək, bu müharibədə şərəfli döyüş yolu keçmiş, amansız döyüşlərdə faşıst gülləsinə tuş gələrək həyatını itirmiş, öz qəhrəmanlığı və şücaəti ilə faşizmin məğlub edilməsinə töhfə vermiş 700 min azərbaycanlının əziz xatirəsini və ləyaqətini kobud şəkildə təhqir etmişdir. Almanların Bakıya daxil olacağı təqdirdə, soyqırım törədəcəkləri fikrinə şübhə ilə yanaşanlar Azərbaycan hökumətinin Almaniyaya qarşı antipatiya yaratmaq məqsədi güddüyü kimi məntiqsiz fikirlər irəli sürürlər. Məlumdur ki, faşıst Almaniyası işğal etdiyi bütün ölkələri viran qoymuşdu. İrqçi ideologiyanın daşıyıcısı olan rejimin Avropada, SSRİ-də və dünyanın müxtəlif bölgələrində yaşayan yüz minlərlə yəhudini kütləvi şəkildə qaz kameralarına göndərməsinin üzərindən hələ çox da zaman keçməyib. Hitlerin yəhudilər qədər təhlükəli hesab etdiyi növbəti zümrə isə kommunistlər idi. Deməli, azərbaycanlıları kütləvi şəkildə məhv etmək üçün Hitlerin əlində bəhanə var idi. Hitlerçilərin işğal etdikləri ölkələrdə uşaq, qadın və qocaya fərq qoymadan yerli əhalini kütləvi şəkildə vaqonlara dolduraraq ölüm yolçuluğuna yollaması o dövr üçün adi hal hesab edilirdi. Əgər Azərbaycan Hitlər tərəfindən işğal edilsəydi, o zaman azərbaycanlılar bu üç vəziyyətdən biri ilə qarşılaşacaqdılar: kütləvi şəkildə soyqırım, imperiyanın qeyri-münbit ərazilərinə deportasiya və yaxud "Ali İrq"ə köləlik...
Məhz Böyük Vətən müharibəsinin qələbə ilə nəticələnməsi azərbaycanlıları soyqırımdan, deportasiyadan, bir dövlət kimi tarix səhnəsindən silinməkdən xilas etdi. "Azadlıq" qəzetinin faşist Almaniyası haqqında ifadə olunmuş fikirləri müasir Almaniya ilə əlaqələndirmək cəhdinə isə qərəzçilik və saxtakarlıqdan başqa bir ad vermək olmaz. Qəzet bununla özünün çirkin və riyakar fəaliyyətinin ana mahiyyətini bir daha ortaya qoymuş, qərbin antiazərbaycan ovqatına köklənmiş dairələrindən aldığı direktivlərə uyğun olaraq, ölkəmizin dünya platformasında günü-gündən artan nüfuzuna və güclənən mövqelərinə xələl gətirmək üçün antiazərbaycan kampaniyası çərçivəsində növbəti addımlardan birini atmışdır. Azərbaycanla Almaniya arasında münasibətlərə xələl gətirmək məqsədi daşıyan bu iddia müəllifin və onun mənsub olduğu düşərgənin düşüncə tərzinin bariz göstəricisidir. Biz veteranlar əminik ki, müəyyən antiazərbaycan dairələrdən idarə olunan "Azadlıq" qəzetinin bu cür iyrənc üsullarla Azərbaycan hökumətinə qara yaxmaq cəhdləri və özünün əsl simasını pərdələmək təşəbbüsü səmərəsiz qalacaq. Azərbaycan xalqı hökumətlə əl-ələ verib daha böyük uğurlara imza atacaq. Biz müharibə, əmək və silahli qüvvələr veteranları olaraq dövlətimizin qayğı və diqqətini hər zaman hiss etmişik. AXC-Müsavat cütlüyünün hakimiyyəti dövründə biganə münasibətlə qarşılaşsaq da, ulu öndər Heydər Əliyevin xalqın təkidli tələbi ilə hakimiyyətə yenidən qayıtması biz veteranlar üçün yeni bir dövrün başlanğıcı oldu. Tarixi ədalət bərpa edildi və biz hərtərəfli dövlət qayğısı ilə əhatə olunduq. Azərbaycan Prezidentinin veteranları hər il Qələbə Günü münasibətilə təbrik etməsi ənənəvi hal alıb. Azərbaycanda Böyük Vətən müharibəsinin iştirakçıları üçün xüsusi olaraq Prezident təqaüdü təsis olunmuşdur. Hər il 9 may - Qələbə Günü ərəfəsində veteranlara birdəfəlik maddi yardımlar verilir. Qeyd etməliyik ki, 1941-1945-ci illər müharibədə iştirak edənlərə verilən birdəfəlik yardımların ən yüksək həcmi MDB üzrə məhz Azərbaycanda qeydə alınmışdır. Müharibə iştirakçıları, eyni zamanda, avtomobil və mənzil ilə də təmin olunurlar. Bu gün cəmiyyətdə layiqli yerini tutan veteranlar dövlət quruculuğu prosesində yaxından iştirak edirlər. Biz bəzi antiazərbaycan dairələrinin əlində alətə çevrilərək, qara siyasi niyyətlərini həyata keçirmək üçün hətta faşizmin müdafiəçiləri rolunda çıxış edənlərə, öz dövlətinə və xalqına qara yaxanlara bildirirk ki, faşizmə qalib gələnlər bu gün də neofaşizmlə və onu dəstəkləyənlərlə mübarizədə ön cəbhədə olacaq, ölkəmizin ərazi bütövlüyünün bərpası və müstəqil dövlətimizin inkişafı yolunda Azərbaycan Prezidentinin və Ali Baş Komandanın sadiq əsgəri kimi qüvvəsini əsirgəməyəcək”.




 
Bölməyə aid digər xəbərlər
18.09.2018
Nəqliyyat, rabitə və yüksək texnologiyalar naziri Qazaxda vətəndaşlarla görüşəcək
18.09.2018
“Ailə münaqişələrinə qarşı mübarizə mövzusunda tədbirlərin təşkili”
18.09.2018
Ağcabədi rayonunun Bilağan kəndinə təbii qaz verilib
17.09.2018
Baş prokuror Qubada vətəndaşları qəbul edəcək
17.09.2018
Heydər Əliyev Fondu tərəfindən inşa olunan yeni məktəb binası istifadəyə verilib

Şərh əlavə olunmayıb



    ,    
Mehriban Nəsib
Araz Hüseyn
Fuad HÜSEYNZADƏ
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10118

1 ADPU-nun rektoru yüksək balla qəbul olunan tələbələrlə görüşüb
2 Ötən tədris ilində Bakı Atatürk Liseyinin 36 məzunu dünyanın müxtəlif universitetlərinin tələbəsi adını qazanıb
3 “Son 15 il ərzində Azərbaycanda 3 mindən çox məktəb tikilib və əsaslı təmir edilib”
4 Krivoy Roqdakı soydaşlarımız festivala hazırlaşırlar
5 Aqil Acalov: “İdmançılar qanvermə aksiyalarında aktiv iştirak edəcəklər”


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info