Avropa Oyunlarının məşəli Qaxda böyük coşqu ilə qarşılanıb
Tarix: 25.05.2015 | Saat: 17:51:00 | E-mail | Çapa göndər


Respublikamızın bölgələrini gəzib dolaşan, şimal-qərb bölgəsi rayonlarını da öz alovunun şəfəqlərinə qərq edən birinci Avropa Oyunlarının məşəli mayın 24-də ölkəmizin dilbər guşələrindən olan Qax rayonuna gətirilib.
Hər tərəfdən uca dağlarla əhatələnən, əsrarəngiz təbiət gözəllikləri ilə görənləri heyran edən bu qədim diyarın sakinləri Avropa Oyunlarının məşəlinin rayona gətiriləcəyi günü böyük səbirsizliklə gözləyir, neçə gündür ki, bu möhtəşəm idman bayramına hazırlaşırlar. Qax şəhərinin bütün küçə və meydanları bayramsayağı bəzədilib, hər tərəfdə səliqə-səhman hökm sürüb, insanlar yüksək bayram əhval-ruhiyyəsində olublar.
Günün ikinci yarısında Qax şəhərinin giriş qapısında, Heydər Əliyev prospektinin başlanğıcında birinci Avropa Oyunlarının məşəlinin təntənəli qarşılanma mərasimi olub. Buraya toplaşan rayon sakinləri yürüş iştirakçılarını böyük coşqu ilə qarşılayıblar. Avropa Oyunlarının rəmzi qapısında universal döyüş növləri üzrə dünya çempionu Ramil Məmmədli məşəli qəbul edib. Sonra məşəlçilər Heydər Əliyev prospekti, İmam Mustafayev küçəsi və Azərbaycan prospekti boyunca 3 kilometrdən çox məsafə qət edərək məşəli Qax şəhərinin mərkəzi meydanına gətiriblər. 2010-cu və 2012-ci illərdə Almaniyada və Portuqaliyada keçirilmiş kunq-fu üzrə dünya birinciliklərinin qalibi Zaur İsakov meydanda qurulmuş səhnəyə qalxaraq məşəli alovlandırıb.
Məşəl estafetinin sonuncu iştirakçısı Zaur İsakov sevincini bölüşərək deyib: “Bu gün sevincimin həddi-hüdudu yoxdur. Azərbaycanda keçiriləcək birinci Avropa Oyunlarının məşəli doğma Qax rayonunda şölələnir. İlk Avropa Oyunlarının Azərbaycanda keçirilməsi ölkə həyatının bütün sahələrində, o cümlədən idman sahəsində qazanılan uğurlarımızın məntiqi nəticəsidir. Bu xoşbəxt anları bizə bəxş etdiyinə görə Prezidentimiz İlham Əliyevə dərin minnətdarlığımızı bildiririk”.
Mərasimdə aprelin 26-da Bakıda, Atəşgah məbədində birinci Avropa Oyunlarının məşəlinin alovlandırılmasını əks etdirən videoçarx göstərilib.
Daha sonra məşəldən alovlandırılan çıraq ilk Avropa Oyunlarının sonunadək saxlanılması üçün Heydər Əliyev Mərkəzinə təqdim edilib.
Birinci Avropa Oyunlarının Azərbaycanda keçirilməsindən qürur duyduğunu bildirən rayon gənclər və idman idarəsinin rəisi Əlövsət Bayramov sevinc hisslərini belə ifadə edib: “İdmanın inkişafı ölkəmizdə prioritet istiqamətlərdən biridir. Son illər paytaxtla yanaşı, bölgələrdə də nəhəng idman komplekslərinin inşa edilməsi ölkəmizdə bu sahənin inkişafına göstərilən diqqət və qayğıya bariz nümunədir. Belə idman komplekslərindən biri iki il əvvəl rayonumuzda da inşa edilib. Qax rayonu həmişə zəngin idman ənənələri ilə seçilib. Bu diyar Şərqdə ilk qadın qrossmeyster Aynur Sofiyeva, şahmatçı Pərvanə İsmayılova, güləşçi Nazim Əlicanov kimi neçə-neçə tanınmış idmançılar yetişdirib. Avropa Oyunlarının məşəlinin rayonumuza gətirilməsi çox böyük hadisədir və heç zaman yaddaşlardan silinməyəcək”.
Rayonun fəal gənclərindən olan Elvin Həsilov isə sevincini bu sözlərlə bölüşüb: “Həyəcanla tarixi anlara şahidlik edirik. Bu əlamətdar hadisə Prezidentimiz İlham Əliyevin yorulmaz fəaliyyətinin parlaq nəticələrindən biri kimi biz gənclərdə də qürur hissi yaradır. Bizə bu sevinci bəxş etdiyinə görə dövlətimizin başçısına minnətdarıq”.
Rayonda nəşr olunan “Şəlalə” qəzetinin redaktoru Novruz Şabanov deyib: “Birinci Avropa Oyunlarının Azərbaycanda keçirilməsi beynəlxalq qurumlar və dünyanın aparıcı dövlətləri tərəfindən ölkəmizə göstərilən böyük etimadın nəticəsidir. Xalqımız Oyunların başlanmasını böyük səbirsizliklə gözləyir. Avropa Oyunlarının məşəli ölkəmizin bütün regionlarında böyük coşqu ilə qarşılanır. Bütün bölgələrimiz bayram libasına bürünüb. Oyunlarda iştirak edəcək idmançılarımıza uğurlar arzulayıram. Əminəm ki, bu möhtəşəm idman yarışı yüksək səviyyədə keçəcək və ölkəmiz daha bir tarixi uğura imza atacaq”.
Gənc müəllimə Elnurə Qasayeva Avropa Oyunlarının məşəlinin Qax rayonuna gətirilməsindən duyduğu sevinci belə ifadə edib: “İlk Avropa Oyunlarının Azərbaycanda keçirilməsindən qürur duyuram. Hər işdə olduğu kimi, burada da birinci olmaq şərəfli və əhəmiyyətlidir. Əminəm ki, Oyunlar zamanı Avropa və bütün dünya bir daha ölkəmizin qüdrətinin, xalqımızın qonaqpərvərliyinin, Azərbaycanın sürətli inkişafının şahidi olacaq”.
Mərasim incəsənət ustalarının ifasında konsert proqramı ilə başa çatıb.
Tural




 
Bölməyə aid digər xəbərlər
19.03.2019
İngiltərə millisinə yeni oyunçu cəlb edilib
18.03.2019
“Barselona“ böyük hesabla “Real Betis“ə qalib gəlib
18.03.2019
Milan derbisində beş qol vurulub
18.03.2019
Azərbaycan komandası Xüsusi Yay Olimpiya Oyunlarında 11 medal qazanıb
17.03.2019
Dünya birinciliyində uğurla çıxış edən Azərbaycan komandası Bakıya qayıdıb

Şərh əlavə olunmayıb

    ,    
Namiq Əliyev
Tural Tağıyev
Namiq Əliyev
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10697

1 Akademik Ramiz Mehdiyev tariximizin xanlıqlar dövrünə sənədlər işığında nəzər salır
2 Təhsilə qoyulan sərmayə gələcəkdə yüksək potensiala malik savadlı gənclərin yetişməsini təmin edəcək
3 Xaricdəki və yerli ictimai birliklərin növbəti virtual görüşü olub
4 “Kaspersky Password Manager” proqramının yeni versiyası şifrənin təhlükəsizliyini yoxlayır
5 “Sondakika.com”: “Apreldən TANAP-ın Avropaya təbii qaz göndərəcək hissəsində sınaqlara başlanacaq”


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info