Suğra Müqabilzadə: “Avropa Oyunları Azərbaycanda oxatmanın inkişafına təkan verəcək”
Tarix: 03.06.2015 | Saat: 01:23:00 | E-mail | Çapa göndər


Qədim zamanlarda oxatma ovçuluq və döyüşdə tətbiq olunsa da, orta əsrlərdə odlu silahların meydana gəlməsi ox və yayı arxa plana keçirdi. Buna baxmayaraq, XVIII əsrin əvvəllərində oxatma nəticə etibarı ilə idman növü kimi yayılmağa başladı və hazırda 140 ölkədə insanlar onunla məşğul olurlar. 1900-cü ildə Parisdə və 1920-ci ildə Antverpendə keçirilmiş Olimpiya Oyunları da daxil olmaqla, Olimpiya Oyunları tarixinin ilk illərində bir neçə dəfə oxatmaya proqramda yer verildikdən sonra bu idman növü 1972-ci il Münhen Olimpiya Oyunlarında yenidən təqdim olundu və həmin tarixdən etibarən Olimpiya proqramında yer aldı. İndi isə növbə Avropa Oyunlarınındır. İyun ayında Bakıda keçiriləcək ilk Avropa Oyunlarında kamandan oxatma yarışlarının keçirilməsi idmanın bu növünə marağı daha da artırıb. “Bakı 2015” Avropa Oyunlarında Avropanın ən sərrast oxatanları öz məharətlərini nümayiş etdirəcəklər. Yarışlar iyunun 16-dan 22-dək Tofiq Bəhramov adına Respublika Stadionunda keçiriləcək. “Bakı 2015” Avropa Oyunları oxatma üzrə yarışan idmançılara “Rio-2016” Yay Olimpiya Oyunlarına kvalifikasiya imkanları yaradır. Ümumiyyətlə, kamandan oxatma Azərbaycanda yeni idman növü deyil. Tarixə nəzər salsaq görərik ki, bu idman növü Azərbaycanda 1969-cu ildən inkişaf etməyə başlayıb. Gözəl ənənələrimiz var. Azərbaycan idmançıları uzun illər SSRİ çempionatları və birinciliklərdə yaxşı nəticələr göstəriblər. Vaxtilə idmanın bu növü üzrə Azərbaycanda bir çox idmançı və beynəlxalq idman ustası hazırlanıb. Bəzi idmançılar SSRİ yığmasının heyətinə də daxil olub və beynəlxalq yarışlarda iştirak ediblər. O dövrdə buna nail olmaq o qədər də asan deyildi. Hazırda da kamandan oxatmada perspektivli gənc idmançılarınız çoxdur. Onlardan biri də Suğra Müqabilzadədir. 2014-cü ildə azərbaycanlı idmançı Suğra Müqabilzadə ilk dəfə Çində gənclər arasında Olimpiya Oyunlarında iştirak edib. Qoşa yarışlarda S.Müqabilzadə ilə yapon idmançısının cütlüyü 32 komanda arasında 8-ci yeri tutub. Bu, Kamandan Oxatma Federasiyası üçün böyük nailiyyətdir. S. Müqabilzadə kamandan oxatma idmanı ilə bağlı bu il Azərbaycanı Nankinq olimpiadasında təmsil edib. Bundan əlavə o, Bakıda keçirilən Federasiyalar Kuboku beynəlxalq turnirində 3-cü yerə layiq görülməklə ən böyük uğuruna imza atıb. Suğra İlk Avropa Oyunlarının 11 elçisindən biridir. 16 yaşlı Suğra Müqabilzadə “Bakı 2015” Avropa Oyunlarında Azərbaycanın böyük ümidlər bəslədiyi idmançılardan biridir.

- Necə oldu ki, bu idman növünü seçdiniz?
-2012- ci ildən milli komandanın üzvüyəm. Bu idmana təsadüfən gəlmişəm. Atamın təkidi ilə idmanla məşğul olmağa başlamışam. Bir çox yarışlarda, o cümlədən müxtəlif beynəlxalq yarışlarda ölkəmi təmsil etmişəm. Bu çox qürurverici hisdir ki, mən ölkəmi təmsil etmək üçün seçilmişəm.
-Bəzən bu idman növünü oğlanlara şamil edirlər. Qadın olaraq bu idmanla məşğul olmaq sizin üçün çətin deyilmi?
- Mən belə deməzdim. Məncə, oxatma qızlar ucun daha yaxşıdır. Çünki bu idman növü zərif bir idman növüdür. Qızların bu idmanla məşğul olmasını çox istərdim.
-Avropa Oyunlarından nə gözləyirsiniz? Azərbaycanın bu Oyunlarda uğurları yetərincə ola bilərmi?
- Avropa Oyunlarının Bakıda, doğma yurdumuzda keçirilməsi çox möhtəşəm bir haldır. Ölkəmizin bu Oyunlarda birinci ev sahibi olması mənə, həqiqətən, böyük sevinc və qurur hissini yaşadır. Oyunların Bakıda olması mənim fikrimcə, hər bir idmançıya əlavə bir qüvvə və inam verəcək. Avropa Oyunları Azərbaycanda oxatmanın inkişafına təkan verəcək. Ölkəmizi təmsil edən hər bir idmançı əlindən gələn qədər yüksək nəticə göstərməyə çalışacaq və inanıram ki, bayrağımızı yüksəldəcəyik.
-Konkret olaraq oxatma üzrə ölkəmizin qələbəsinə inanırsınızmı?
- Oxatma elə bir idman növüdür ki, hər şey bir saniyə içində dəyişə bilər. Mən inanıram ki, oxatma idman növü lazımi nəticəni göstərəcək.
-Gələcəkdə də bu idman növü üzrə fəaliyyətinizi davam etdirmək niyyətiniz varmı?
- Əlbəttə. Əgər hər şey yolunda gedərsə, bu idman növü ilə bacardığım qədər məşğul olmaq istəyərdim. Gələcək planlarımın içində oxatmanın ayrı yeri var. Çox istərdim ki, qızlarımız bu idman növü ilə məşğul olsun. Dediyim kimi, bu, çox zərif və incə idman növüdür.
-Rəqiblərinizi güclü hesab edirsinizmi? Nəhayət, bu Oyunlarda bayrağımızın ucaldılacağına əminsinizmi?
- Hər bir oxatan mənim üçün güclü rəqibdir. Çünki yarış zamanı hər şey mümkündür. Ən zəif rəqib belə çox güclü nəticə göstərə bilər. Əlbəttə, bu Oyunlarda bayrağımızı ucaldacağımıza əminəm və inanıram. Necə deyərlər, inam qələbənin yarısıdır.
- Avropa Oyunlarının elçisi olmaq sizdə hansı təəssüratlar, hisslər oyadır?
- İdman elcisi olduğum üçün çox sevinc və fəxr hissi keçirirəm. Bu Oyunları tanıtmaqda elçilərin arasında mənim də rolumun olduğunu bilmək çox xoşdur.
Nigar Abdullayeva




 
Bölməyə aid digər xəbərlər
24.09.2018
“Azərbaycanda xalq yaradıcılığına maraq artıb”
23.09.2018
Biz tələbələri nəzəri cəhətdən çox yaxşı hazırlayırıq, ancaq praktiki cəhətdən yox
22.09.2018
Azərbaycan dinlərin və mədəniyyətlərin toqquşduğu deyil, qovuşduğu bir yerdir
21.09.2018
“Tələbələrin ixtisasa uyğun təcrübə qazanmaları üçün kifayət qədər imkanlar var”
18.09.2018
“Bu il sığorta bazarı 40 faizdən çox genişlənib, yığımlar artıb”

Şərh əlavə olunmayıb



    ,    
Mehriban Nəsib
Araz Hüseyn
Fuad HÜSEYNZADƏ
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10146

1 Yalnızlıq qorxusu
2 “Vətən uzaqda deyil” telelayihəsi dünya azərbaycanlılarının sevincinə səbəb olub
3 “Azərbaycanda xalq yaradıcılığına maraq artıb”
4 Cəfər Cəfərov: “Hər bir ölkənin gələcəyi yüksək səviyyəli kadrlardan asılıdır”
5 “Türkiyə və Azərbaycanla yaxın münasibətlər quran Rusiya Ermənistanın maraqlarına heç bir məhəl qoymur”


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info