Çadırların yolu kəsməsi sıxlığı daha da artırır
Tarix: 29.01.2013 | Saat: 19:23:00 | E-mail | Çapa göndər


Paytaxtda tıxacların yaranmasının bir səbəbi də yollarda qurulan mərasim çadırlarıdır

Kənd yerlərindən fərqli olaraq paytaxtda yas mərasimini təşkil etmək daha çətin və problemlidir. Belə ki, mərasimi başa vurmaq üçün lazım olan hər şey kirayə götürülür. Kirayə edilən avadanlıqlar içərisində istifadə edilən məişət avadanlığından tutmuş çadırlara qədər var. Bütün xərcləri hesablayanda heç kimə ölmək məsləhət deyil.

Amma mövzumuz heç də ölmək deyil, ölümdən sonra təşkil edilən yas mərasimlərinin harda keçirilməsidir. Paytaxtda yas mərasimini keçirmək üçün kirayə edilən çadırlarsa adətən avtomobil yollarında qurulur. Bu da nəqliyyatın gediş-gəlişinə maneə yaradır. Ötən il çadırların yolu bağlamasının qarşısını almaq üçün aidiyyəti qanunlara müvafiq düzəlişlər qəbul edildi. Qanuna görə, yas mərasimi vermək üçün qurulan çadırlar avtomobil yollarını bağlayırsa, İnzibati Xətalar Məcəlləsinin 165-ci maddəsinə əsasən, cərimə tətbiq edilir. Cərimələrsə müxtəlif məbləğlərdədir. Fiziki şəxslər buna görə 40-50, vəzifəli şəxslər 250-300, hüquqi şəxslər isə 500-600 manat ödəməlidir. Bununla yanaşı, “Yol hərəkəti haqqında” qanunun 12-ci maddəsində göstərilib ki, yol yalnız xüsusi hallarda bağlana bilər, bu da səlahiyyətli şəxsin xüsusi əmri ilə. Məcəlləyə edilən dəyişikliyi həm nəqliyyatda problemlərin yaranması, həm də başqa bir qanunun pozulmasının qarşısının alınması baxımından doğru hesab etmək olar. Çünki hər keçən gün daha da çoxalan paytaxt avtomobillərinin yaratdığı sıxlıq onsuz da kifayət qədərdir. Bir tərəfdən də belə çadırların yolu kəsməsi bu sıxlığı daha da artırır. Elə paytaxtda tıxacların yaranmasının bir səbəbi də yollarda qurulan mərasim çadırlarıdır. Amma məsələnin başqa tərəfləri də var. Belə ki, yas mərasimlərinin keçirilməsi üçün istifadə edilən xüsusi tikililər (söhbətgahlar-”besedkalar”) sovet zamanında olsa da, sonradan demək olar ki, ləğv edilib. Bu tikililərin bir çoxu müasir formalı yaşayış binaları tikildikcə, şəhərin gözəlliyinə xələl gətirdiyinə görə sökülüb. Bir çoxu da özəlləşdirilib çayxana, restoran və s. obyekt kimi fəaliyyət göstərir. İndi belə tikililər olmadığı halda, küçədə çadır qurub yas mərasim keçirənləri də hardasa qınamaq olmur. Bəs yas mərasimləri harada keçirilməlidir?
Qafqaz Müsəlmanları İdarəsinin Mətbuat xidmətindən məsələ ilə bağlı bildirdilər ki, Bakıda “Təzə Pir” və “Cümə” məscidlərində yas mərasimlərini keçirmək üçün şərait yaradılıb. Gələcəkdə isə başqa məscidlərdə də belə şəraitin yaradılması gözlənilir. Sirr deyil ki, “Təzə pir”in təklif etdiyi qiymətlər heç də sıravi müsəlmanların cibinə uyğun deyil. QMİ rəhbəri Allahşükür Paşazadənin qardaşı, millət vəkili Cavanşir Paşazadə ötən ilin mayında məsələ ilə bağlı KİV-lərə açıqlama vermişdi. C.Paşazadə qeyd etmişdi ki, “Təzə pir”də bir dəfəyə üç min nəfərlik yemək hazırlamaq üçün mətbəx fəaliyyət göstərir: “Hər biri 300 nəfərlik olmaqla, 6 zal var. Bu zalların təmizliyi ən yüksək səviyyədə təmin olunub. Artıq insanların küçələrdə çadır qurub yas mərasimi keçirməsinə ehtiyac qalmayıb”. O deyib ki, qiymət sifarişdən asılıdır:” Adam var, ehsan çay süfrəsindən ibarət olur. Orta hesabla götürsək, yas mərasimində adamın biri üçün 10 manat tələb olunur”. Yas çadırlarının ləğvinə gəlincə isə qurum bu məsələ ilə onların maraqlanmadığını bildiridi. Hərçənd ki Çadırların ləğvindən ən çox uduşlu mövqeyi olan tərəfin xeyir-şər evlərinin olacağı şübhə doğurmur.
Əslində vəziyyətdən çıxış da var. Belə bir çıxışı Səbail rayonu təqdim edir. Belə ki, hələ məhdudiyyətlər tətbiq edilməzdən qabaq Səbail rayonu ərazisində xeyir-şər evləri əsaslı təmirlə sakinlərin istifadəsinə verilirdi. Bu barədə qəzetimizə açıqlama verən Səbail Rayon İcra Hakimiyyətinin şöbə müdiri İsrafil Kərimovun sözlərinə görə, Badamdar qəsəbəsində icra hakimiyyəti başçısının sakinlərlə açıq görüşü zamanı edilən müraciətlərə əsasən, xeyir-şər üçün istifadəsi nəzərdə tutulan xüsusi bina da tikilib: “Bina tikmək məqsədilə ordakı yarğan dolduruldu. Əvvəllər vəfat edən şəxləri şəriətə uyğun olaraq yumaq üçün də problemlər yaranırdı. Camaat ölülərini yumaq üçün başqa məscidlərə aparmağa məcbur olurdu. İndi isə həmin yerdə dünyasını dəyişənləri yumaq məqsədilə hər bir şəraiti olan xüsusi otaq var”. İ.Kərimov qeyd etdi ki, 250 nəfərlik yeri olan xüsusi binada mərasimi aparmaq üçün molla da var: “Avadanlıqlara nəzarət etmək üçün bir nəfər nümayəndə də təyin edilib. Ötən ilin yanvar ayında “Mətbuat prospekti 2” ünvanında 4 binanın yerləşdiyi ərazidə daha belə bir bina inşa edilib. Bu binalarda bütün xərclər icra hakimiyyətinin daxili imkanları hesabına həyata keçirilir. Qeyd edim ki, Səbail rayonu ərazisində olan bu evlərdən Badamdar və 20-ci sahənin sakinləri də istifadə edirlər”. Bundan başqa, “Abad həyət” layihəsi çərçivəsində Səbail rayonu ərazisindəki köhnə söhbətgahlar təmir edilir və ya yeniləri inşa edilir”.
Deməli, tətbiq edilən məhdudiyyətlər vətəndaşlara heç bir maddi sıxıntı gətirməyə bilər. Yetər ki, yerli strukturlar problemin həlli yolunda addımlar atsınlar.
FUAD




 
Bölməyə aid digər xəbərlər
22.02.2019
Sahil Babayev canlı efirdə 36 vətəndaşın müraciətini cavablandırıb
22.02.2019
“Prezidentin Əfqanıstan müharibəsi veteranlarına və bu müharibədə həlak olanların ailələrinə qayğısı davamlıdır”
22.02.2019
“AZƏRSUN HOLDİNQ“ İnsan Resursları üzrə mütəxəssis axtarır
22.02.2019
Bu il Bakının 4 rayonunda “DOST” mərkəzləri yaradılacaq
21.02.2019
Dövlət Əmək Müfəttişliyi Xidməti işəgötürənlərə müraciət edib

Şərh əlavə olunmayıb

    ,    
Namiq Əliyev
Namiq Əliyev
Fuad HÜSEYNZADƏ
Tural Tağıyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10615

1 Milli qəhrəmanlara və şəxsiyyətlərə hücum savaşın tərkib hissəsidir
2 Diaspor üzvləri Ümumavropa Qarabağ mitinqinə çağırış edib
3 Əsərləri dünyanın bütün elektron kitabxanalarında yer alan azərbaycanlı yazar
4 1400 manat maaşla sürücü axtarılır
5 “İnternet medianın getdikcə daha da aktivləşməsi tendensiyasını müşahidə edirik”


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info