İsrailli jurnalist: “Avropa Oyunlarının açılış mərasimi əsl şedevr idi”
Tarix: 29.06.2015 | Saat: 20:41:00 | E-mail | Çapa göndər


“Mən çox təəssüflənirəm ki, İsraildə futbol, basketbol, cüdo və bəlkə bədii gimnastika istisna olmaqla, idmanı çox nadir hallarda xatırlayırlar. Digər tərəfdən təəssüflənirəm ki, İsrail cəmiyyətində ölkələrimiz arasında dostluq münasibətləri barədə məlumat azdır, ümumiyyətlə, İsraildə Azərbaycanı hələ lazımınca tanımırlar. Mənim fikrimcə, bu böyük problem bizim ümumi səylərimizlə həll edilməlidir. Tamamilə əminəm ki, Azərbaycan öz turizm potensialına görə, ən azından, Gürcüstandan zəif deyil, lakin hələlik bu potensialdan, yumşaq desək, lazımınca istifadə edilmir”.
İsrail radio verilişlərinin məşhur aparıcısı, İsrailin Birinci radiosunun informasiya xidmətinin rəhbəri, bu yaxınlarda Bakıda birinci Avropa Oyunlarının açılış mərasimində iştirak etmiş Mark Kriçevski bu sözləri söyləyib.
Mark Kriçevski deyib: “Açılış mərasimi, əlbəttə, superfantastik hadisə idi. Məncə bu məsələdə iki fikir ola bilməz. Bakıda birinci Avropa Oyunlarının açılış mərasimi əsl şedevr idi. Bu mərasimdə Qərb və Şərq rəqabət aparmır, bir-birini tamamlayırdı. Mən hadisələrə çox nadir hallarda birmənalı şəkildə qiymət verirəm, lakin bu elə hadisədir ki, ona yalnız heyran olmalıyıq. Bir məqamı da qeyd etmək lazımdır ki, adamların sayının hədsiz çox olmasına baxmayaraq, istər stadionda, istərsə də metroda hər hansı təhlükə hissi duyulmurdu. Hər şey çox dəqiq təşkil edilmişdi. Olimpiya stadionunun özündə misli görünməmiş təhlükəsizlik tədbirləri təmin olunmuşdu, mən hətta İsraildə də belə bir hadisəni xatırlamıram”.
İsrailin Birinci radiosunun informasiya xidmətinin rəhbəri Avropa ölkələrinin bəzi dairələri tərəfindən Azərbaycana qarşı açıq-aşkar, bəzən də sifarişli hücumların əsassız olması barədə sualın cavabında qeyd edib ki, bu fakta sadə və sakit münasibət göstərmək lazımdır, hərçənd aydındır ki, bu, mürəkkəb, bəzən isə adama ağır gələn məsələdir. Mark Kriçevski vurğulayıb: “İsrailin sabiq baş naziri Qolda Meirin belə bir kəlamı vardı: “Dünyada nə danışırlar danışsınlar, əsas məsələ yəhudilərin nə etmələridir”. Həmin kəlamda “yəhudilər” sözünü “azərbaycanlılar” sözü ilə əvəz edin, onda öz sualınıza cavab alarsınız. Siz öz yolunuzla gedin, başqalarının sizdən istədiyi işləri yox, Azərbaycan üçün daha yaxşı və daha faydalı olan işləri görün. Düşmənlərinizə isə labüd bəla kimi münasibət bəsləyin, çünki özünüz dediyiniz kimi, onlar olublar, vardırlar və olacaqlar. Düşmənlər sizin inkişafınız üçün daha bir stimul olmalıdır. İnanın ki, əgər biz İsraildə öz “dostlarımız"ın hamısına fikir versəydik, çoxdan ağlımızı itirərdik. Amma, gördüyünüz kimi, biz sağ-salamatıq və özümüzü tamamilə yaxşı hiss edirik”.
Anons kimi verilmiş məlumata görə, İsrailin Birinci radiosu “Bakı-2015” birinci Avropa Oyunları haqqında xüsusi radio verilişi hazırlayır. Mark Kriçevski buna cavab olaraq deyib ki, o, həmin verilişin təkcə birinci Avropa Oyunları haqda deyil, ilk növbədə həmin Oyunlardan və gözəl Bakıya səfərindən aldığı təəssüratlar barədə veriliş olacağına ümid bəsləyir.
“Axı mən idman jurnalisti deyiləm, mən siyasət və cəmiyyət məsələləri üzrə ixtisaslaşmışam. Məni maraqlandıran - insanlardır, onların problemləridir. Özümü daha sərbəst hiss etmək üçün çox adamla, özü də kifayət qədər səmimi söhbət etmişəm. Mən “Media Kəndi”ndə yox, mehmanxanada qalıram. Bakıdakı dostlarımın hamısına ürəkdən təşəkkür edirəm, onlar bu məsələdə mənə çox kömək etdilər. Mən jurnalistlərlə birlikdə mütəşəkkil səfərlərdən imtina etdim, ictimai nəqliyyatdan, ilk növbədə məşhur Bakı metrosunun xidmətlərindən istifadə edirəm.
Buna görə həmin verilişdə əsasən yol qeydlərimdən istifadə edəcəyəm. Təbii ki, Bakıda keçirilən birinci Avropa Oyunlarına böyük yer veriləcək, xüsusən ona görə ki, beynəlxalq münasibətlər sahəsində tanınmış israilli ekspert, Azərbaycan mətbuatında fəal çıxış edən, Azərbaycan dilini gözəl bilən, yerli sakinlərin mentalitetinə yaxşı bələd olan, Azərbaycanın İsraildə populyarlaşdırılması naminə böyük və səmərəli iş aparan Arye Qut ilə birlikdə veriliş hazırlamaq mənim üçün çox maraqlı və vacibdir.
Mən çox istəyirəm ki, müasir Azərbaycanı insanlara tanıdım. Bakıda səfərdə olduğum müddətdə öyrənmişəm ki, Azərbaycanda qadınlar səsvermə hüququnu hələ 1918-ci ildə - bütün müsəlman Şərqində ilk respublika olan Azərbaycan Xalq Cümhuriyyəti dövründə, yəni Böyük Britaniyada və Amerikada qadınların belə bir hüququ olmadığı bir vaxtda əldə ediblər. Hətta mənim İsraildə boya-başa çatmış 20 yaşlı kiçik qızım da əmin idi ki, sizin gözəl qadınların hamısı çadra örtür. Buradan qızıma göndərdiyim fotoşəkilləri görəndə o çox heyrətləndi. Düşünürəm ki, onda əvvəl yaranmış yanlış əminlik həm İsrail üçün, həm də Azərbaycan üçün ciddi qüsurdur. Biz bir-birimizi təkcə hökumətlər səviyyəsində deyil, adi insanlar səviyyəsində də yaxından tanımalıyıq, çünki bizim ölkələrimiz və xalqlarımız arasında çox vacib insanlıq körpüsü var – bu, Azərbaycandakı yəhudi icması və İsraildə əslən Azərbaycandan olan sakinlər icmasıdır”.




 
Bölməyə aid digər xəbərlər
21.11.2018
“Belarusa səfər Prezident İlham Əliyevin xarici siyasət istiqamətində növbəti uğurudur”
21.11.2018
Ukrayna NATO və Avropa İttifaqına üzvlüyə hər an yaxınlaşır
20.11.2018
Yeni Azərbaycan Partiyası: iqtisadi və siyasi müstəqilliyi möhkəmləndirən ideyalar məktəbi
19.11.2018
“Qaçaqmalçılığa qarşı mübarizə sahəsində yüksək göstəricilər əldə olunub”
19.11.2018
Səfir: Azərbaycanla Pakistan arasında olan strateji tərəfdaşlıq münasibətləri bütün sahələrdə əməkdaşlığa öz töhfəsini verir

Şərh əlavə olunmayıb



    ,    
Namiq Əliyev
Tural Tağıyev
Namiq Əliyev
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10509

1 Şervin Nəcəfpur: “Norveçdə doğulub boya-başa çatsam da, Vətən uzaqda deyil”
2 “Tələbə Baharı-2018”-in mükafatçısı: “Hər gün xalq mahnılarımızı dinləyirəm”
3 Rufiz Qonaqov: Bako Saakyanın Fransaya qanunsuz səfəri Minsk qrupunun həmsədri olan bu ölkə üçün qara ləkədir
4 Eldar Əzizov Bakı Şəhər İcra Hakimiyyətinin başçısı təyin edildi
5 Abel Məhərrəmov BDU-nun rektoru vəzifəsindən azad edilib


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info