“Belarusda hər hansı iftiranın və destabilləşdirmə mənbəyinin qarşısını almağı öyrənmişik”
Tarix: 13.10.2015 | Saat: 16:39:00 | E-mail | Çapa göndər


Belarus Prezidenti Aleksandr Lukaşenko bildirib ki, ölkədə vəziyyəti destabilləşdirmək üçün xeyli cəhdlər olub. O, bu barədə sonra danışacağına söz verib. BELTA-nın verdiyi xəbərə görə, bunu dövlət başçısı MDB İcraiyyə Komitəsinin sədri - icraçı katib Sergey Lebedevlə söhbətində deyib. Aleksandr Lukaşenko qeyd edib ki, ölkədəki vəziyyətə görə narahat olub. “Cəhdlər çox oldu, lakin bunu heç kim eşitmədi və heç kim görmədi, deməli, biz sakit işləməyi, Belarusda hər hansı iftiranın və hətta destabilləşdirmə mənbəyinin qarşısını almağı öyrənmişik”, - deyə o bildirib. A.Lukaşenko əlavə edib ki, vaxt gələcək, biz bu cəhdlər haqqında danışacağıq, onu insanlara göstərəcəyik, qoy onlar bilsinlər.
Prezident seçkiləri kampaniyasından danışan A.Lukaşenko vurğulayıb ki, heç kəsin, xüsusilə qərb partnyorlarımızın, müşahidəçilərimizin bizi məzəmmət etməməsi üçün mümkün olan hər şey edilib. Belarus lideri deyib: “Mən dünən açıq şəkildə deməli oldum. Biz elə eləmədik ki, Qərb, nəhayət, Belarusda demokratikliyi görsün. Sözün açığı, onlar bunu gördülər. Bunu necə çatdırmaq isə öz işləridir”.
Prezident MDB müşahidə missiyasına onların apardıqları böyük işə və obyektivliyə görə təşəkkür edib.
Xəbər verdiyimiz kimi, Azərbaycan Milli Məclisinin deputatı Rüfət Quliyev və MDB-nin Parlamentlərarası Assambleyasında Milli Məclisin daimi nümayəndəsi Aydın Cəfərov MDB PA tərkibində müşahidəçi kimi Belarusda prezident seçkilərini izləyiblər.
Tural