BANM-in gənc müəllimi: “Daim yenilik və inkişaf axtarışında olmalıyam”
Tarix: 29.12.2015 | Saat: 19:17:00 | E-mail | Çapa göndər


“Bir gənc olaraq ali təhsil ocağında işləmək həm çox maraqlı, həm də çox məsulliyətlidir. Təcrübəli professor-müəllim heyəti ilə birlikdə çalışdıqca müəllimlik peşəsinin sirlərini mükəmməl şəkildə dərk edəcəyimi düşünürəm”

Bu gün xaricdə təhsil alan bir çox azərbaycanlı gənclər var ki, onların yüksək ixtisaslı gənc kadr kimi Vətənə dönməsi və burada müvafiq qurumlarda çalışması ölkəmizin həm təhsil, həm də iqtisadi gücünün artmasına təkan verir. Onlardan bir qismi məhz müəllim kimi çalışmağa üstünlük verir. Bugünlərdə təhsil naziri də çıxışında bildirib ki, heç bir təhsil sisteminin gücü onun tərkibində fəaliyyət göstərən müəllimlərin gücündən üstün ola bilməz. Yüksək ictimai status daha bilikli və hazırlıqlı insanların bu peşəni seçməsinə stimul yaradır. Bu gün müəllim peşəsini seçən gənclərimizdən biri də Sevda Zərgərovadır.
Zərgərova Sevda Hüseyn qızı 1987-ci ildə Bakıda anadan olub. 2004-cü ildə Bakıda Fizika-riyaziyyat və informatika təmayüllü liseyi bitirib. Həmin il TQDK-nın keçirdiyi ali məktəblərə qəbul imtahanında 666 bal toplayaraq Qafqaz Universitetinə daxil olub və Prezident təqaüdçüsü adına layiq görülüb. 2004-2005-ci tədris ilində Qafqaz Universitetində təhsil aldıqdan sonra Türkiyə Respublikasının Orta Doğu Texniki Universitetinin “Kimya mühəndisliyi” fakültəsinə daxil olub. 2010-cu ildə fərqlənmə diplomu ilə həmin ali təhsil müəssisəsinin məzunu olub və elə həmin il də Türkiyədə Hacettepe Universitetinin “Kimya mühəndisliyi” fakültəsinin magistratura pilləsinə daxil olub. 2013-cü ildə təhsilini müvəffəqiyyətlə başa çatdıraraq Vətənə dönüb. Sevda Zərgərova 2013-cü ilin oktyabr ayında Bakı Ali Neft Məktəbinin (BANM) “Kimya mühəndisliyi” kafedrasında müəllim kimi fəaliyyətə başlayıb. O, həmçinin 2014-cü ildən Y.H.Məmmədəliyev adına Neft-Kimya Prosesləri İnstitutunun “Neft kimyası” ixtisası üzrə dissertantıdır. Hazırda BANM-ın “Kimya mühəndisliyi” kafedrasında baş müəllim vəzifəsində çalışır.
- Kimyaya marağınız haradan yaranıb? İxtisasınız üzrə xaricdə təhsil almaq fikrinə necə gəldiniz?
-Texniki fənlərin hamısına hər zaman böyük marağım olub. Təbiət elmlərindən olan kimyaya qarşı isə marağım xüsusi olub. Anam orta məktəbdə kimya müəllimidir. Ona görə də, bizə “Kimya”nın sadəcə texniki bir fənn olaraq deyil, eyni zamanda tətbiqi sahələrini də öyrədib. Gündəlik həyatımızda gördüyümüz hadisələrin kimyəvi tərəflərini bizlərə göstərir, elmi mənalarını izah edərdi. Bu da mənə həmişə maraqlı gələrdi. Əslində xaricdə təhsil almaq fikri mənim üçün gözlənilməz oldu. Orta məktəb illərində Azərbaycan Respublikası Təhsil Nazirliyinin “Riyaziyyat” fənni üzrə keçirdiyi şəhər və respublika fənn olimpiadalarında iştirak etmişdim və respublika üzrə 2-ci və 3-cü dərəcələrə sahib idim. Yüksək nəticələrimə görə, bp şirkəti tərəfindən təşkil olunan imtahana dəvət olundum. İmtahandan qazandığım yüksək nəticəyə əsasən, bp şirkətinin təqaüdünə layiq görüldüm və eyni zamanda, təhsilimi xaricdə davam etdirmək imkanı əldə etdim. Təhsilimi başladığım andan etibarən verdiyim qərarın doğruluğundan əmin oldum. İxtisasımın dərinliklərinə yiyələndikcə, Azərbaycanda “Kimya mühəndisliyi” ixtisasının yaradılmasının vacibliyini dərk etdim.
- Sizin fikrinizcə, xaricdə təhsil almağın hansı müsbət cəhətləri və ya fərqləri var?
- Xaricdə təhsilin əsas müsbət tərəflərindən biri ondan ibarətdir ki, Vətəndən uzaq olduğumuz müddətdə “Vətən” sözünün mənasını daha dərindən dərk etmək mümkündür. Bu zaman ərzində Vətənə olan sevgimizi və ona qarşı borclarımızı, məsuliyyətimizi görə bilirik. Vətəndən, ailədən, doğma insanlardan məsafəcə uzaqlıq əslində mənəvi olaraq onlara yaxınlıq yaradır. Xaricdə təhsilin digər müsbət xüsusiyyəti odur ki, öz hüquqlarımızı və öhdəliklərimizi daha yaxşı anlayırıq. Başqa millətlərin qarşısında Azərbaycanın gəncliyinin təmsilçilərinə çevrilirik. Nəticə olaraq, qısa bir zamanda müstəqil şəxs kimi formalaşma yaranır. Başqa müsbət xüsusiyyət isə, beynəlmiləl tələbələrlə təmasda olduqca fərqli mədəniyyətlər, fərqli insanlarla ünsiyyətdir.
- İlk işinizə harada başlamısız?
- İlk dəfə bp şirkətində 2008-ci ildə 2 aylıq yay təcrübəsi keçdim. İlk maaşımı da həmin şirkətdə almışdım. Təbii ki, ilk maaşımın məbləğini xatırlayıram, amma sirr olaraq qalmasını istərdim. Sadəcə çox bərəkətli olduğunu vurğulaya bilərəm. Mənim üçün tədris zamanı aldığım təqaüdlər daha çox qürurverici idi. Tədris illərimdə dörd təqaüd almışam- Prezident təqaüdü, bp şirkətinin təqaüdü, Qafqaz Universitetinin təqaüdü və Türkiyə Respublikasının Başbakanlık təqaüdü. Bu günə kimi də hamısı ilə fəxr edirəm.
-Bəs Bakı Ali Neft Məktəbində fəaliyyətə başlamanız necə oldu ?
-Təhsilimi bitirdikdən sonra, 2013-cü ildə Azərbaycana geri qayıtdım və iş axtarmağa başladım. Azərbaycanda yeni tədris ocağı olan BANM-in fəaliyyət göstərməyə başladığını eşidincə birbaşa sənədlərimi təqdim etməyi qərara aldım. Təhsil ocağının müasir təhsil metodlarından, elektron tədrisdən istifadə etməsi mənim üçün çox cəlbedici oldu. Eyni zamanda, təhsilin ingilis dilində olması mənim üçün üstünlük yaratdı. Təhsilimi ingilis dilində aldığım üçün fəaliyyətimi də ingilis dilində davam etdirmək istəyirdim. Qısa bir müddətdən sonra Ali Məktəbin rektoru Elmar Qasımov tərəfindən dəvət aldım və “Kimya mühəndisliyi” kafedrasında müəllim vəzifəsində fəaliyyətə başladım. Hazırda 2 ildən artıqdır ki, BANM-də fəaliyyət göstərirəm.
-Bir gənc müəllim olaraq gənclərlə və professor-müəllim heyəti ilə işləməyin məsuliyyəti nədən ibarətdir?
-Bir gənc olaraq ali təhsil ocağında işləmək həm çox maraqlı, həm də çox məsulliyətlidir. Təcrübəli professor-müəllim heyəti ilə birlikdə çalışdıqca müəllimlik peşəsinin sirlərini mükəmməl şəkildə dərk edəcəyimi düşünürəm. İstər “Kimya mühəndisliyi” kafedrasının, istər də digər kafedraların təcrübəli müəllimləri tərəfindən verilən tövsiyələrə əməl etməyə, onların təcrübələrindən yararlanmağa çalışıram. Eyni zamanda, gənc müəllim olaraq gənclərlə birlikdə çalışmaq çox maraqlıdır. Bir gənc kimi gənclərin dinamikasına, sürətlərinə yetişmək mənim üçün daha rahatdır. Yüksək potensiala, biliklərə malik tələbələrlə işləyərkən daim yenilik və inkişaf axtarışında olmalıyam.
Nigar Abdullayeva











 
Bölməyə aid digər xəbərlər
22.09.2018
Reytinq: Bakı dünyanın ən təhlükəsiz 41 şəhəri sırasında yer alıb
22.09.2018
Xüsusi Olimpiya Hərəkatı gənc liderlərin 20-ci Qolobal Forumu keçiriləcək
21.09.2018
Azərbaycanın ən sürətli mobil şəbəkəsinin adı açıqlanıb
21.09.2018
Baş prokuror Quba rayonunda vətəndaşları qəbul edib
21.09.2018
Sahil Babayev Göygöl rayonunda 4 rayon və şəhərin sakinləri ilə görüşüb

Şərh əlavə olunmayıb



    ,    
Mehriban Nəsib
Araz Hüseyn
Fuad HÜSEYNZADƏ
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10131

1 Ötən tədris ilində Bakı Atatürk Liseyinin 36 məzunu dünyanın müxtəlif universitetlərinin tələbəsi adını qazanıb
2 “Bu il sığorta bazarı 40 faizdən çox genişlənib, yığımlar artıb”
3 Krivoy Roqdakı soydaşlarımız festivala hazırlaşırlar
4 “Türkiyə və Azərbaycanla yaxın münasibətlər quran Rusiya Ermənistanın maraqlarına heç bir məhəl qoymur”
5 QHT sədri Ukraynadakı “Qafqaz“ xalq rəqs ansamblına milli geyimlər hədiyyə edib


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info