Xətai rayonu Tokio prefekturasının Setaqaya şəhəri ilə qardaşlaşacaq 
Tarix: 05.12.2016 | Saat: 17:24:00 | E-mail | Çapa göndər


Azərbaycan ilə Yaponiya arasında regionlararası əməkdaşlığın inkişaf etdirilməsi çərçivəsində Bakı şəhəri Xətai rayonu icra hakimiyyətinin başçısı Razim Məmmədovun rəhbərlik etdiyi nümayəndə heyəti noyabrın 29-dan dekabrın 5-dək Tokioda işgüzar səfərdə olub.
Səfərin əsas məqsədi iki dost ölkə arasındakı münasibətlər tarixində ilk dəfə paytaxt şəhərlərin rayonları arasında dostluq və əməkdaşlıq münasibətlərinin yaradılması və bu məqsədlə Bakı şəhərinin Xətai rayonu ilə Yaponiyanın Tokio prefekturasının Setaqaya şəhəri arasında əlaqələrin qurulmasıdır. Nümayəndə heyətinin tərkibinə Milli Məclisin deputatı, Yeni Azərbaycan Partiyası (YAP) Xətai rayon təşkilatının sədri Hüseynbala Mirələməov və rayon icra hakimiyyəti ictimai-siyasi və humanitar məsələlər şöbəsinin müdiri Pənah İmanov daxil idi.
Səfər çərçivəsində nümayəndə heyətinin üzvləri Yaponiya hökumətinin, xarici işlər nazirliyinin, hakim siyasi partiyanın, Tokio prefekturasının rəsmi nümayəndələri və Azərbaycanla əməkdaşlıqda maraqlı olan bir sıra yapon şirkətlərinin rəhbərləri ilə görüşərək işgüzar müzakirələr aparıblar. Eyni zamanda, nümayəndə heyətinin üzvləri Tokio prefekturasının Tullantıların Emalı Mərkəzinin və 2020-ci ildə Tokioda keçiriləcək Olimpiya və Paralimpiya Oyunlarının təşkilat komitəsinin yarışlara hazırlıqla bağlı fəaliyyəti ilə də tanış olublar.
Görüşlərdə Azərbaycan nümayəndə heyətinin rəhbəri Razim Məmmədov ölkəmizin müstəqilliyini bərpa etdikdən sonra ümummilli lider Heydər Əliyevin rəhbərliyi ilə dövlətçiliyin möhkəmləndirilməsi, iqtisadiyyatın bərpası və sürətli inkişafı ilə bağlı strategiyanın işlənib hazırlanması barədə məlumat verib. Vurğulayıb ki, bu strategiyanın Prezident İlham Əliyev tərəfindən uğurla həyata keçirilməsi nəticəsində Azərbaycan regionun lider dövlətinə çevrilib və dünyanın ən sürətlə inkişaf edən iqtisadiyyatları arasında mövqeyini möhkəmləndirib.
Xətai rayonunun sosial-iqtisadi göstəriciləri barədə məlumat verən icra hakimiyyətinin başçısı ulu öndər Heydər Əliyevin “Bir vaxt gələcək qara şəhər “Ağ şəhərə” çevriləcəkdir” sözlərini xatırladıb, bunun artıq həqiqətə çevrildiyini vurğulayıb.
Görüşlərdə Ermənistan-Azərbaycan, Dağlıq Qarabağ münaqişəsi, erməni işğalçılarının Xocalıda törətdiyi soyqırımı və bu faciəyə həsr edilən abidənin məhz Xətai rayonu ərazisində yerləşdiyi xüsusi qeyd olunub.
Xətai rayonunun beynəlxalq əməkdaşlığa xüsusi diqqət yetirdiyini bildirən R.Məmmədov rayonun Türkiyənin Mersin vilayətinin Tarsus şəhəri və Belarusun Minsk şəhərinin Leninsk rayonu ilə qardaşlıq münasibətlərinə malik olduğunu deyib. Tarsus şəhərində ümummilli lider Heydər Əliyevin adını daşıyan körpünün və parkın inşa edildiyini, həmin parkda Ulu Öndərin abidəsinin ucaldıldığını qeyd edib. Gələcəkdə Tokio prefekturasının Setaqaya şəhəri ilə də bu cür əməkdaşlığın hər iki tərəf üçün faydalı olacağını vurğulayıb.
Görüşlər zamanı Xətai rayonunda 2015-ci ildə “Kosugi Zohen Co.LTD” şirkəti tərəfindən salınmış “Yapon bağı”nın Azərbaycan və yapon xalqları arasında dostluq əlaqələrinin rəmzinə çevrildiyi xüsusi qeyd edilib.
Görüşlərdə Milli Məclisin üzvü Hüseynbala Mirələmov iki dövlət arasındakı dostluq münasibətlərinin xalqlarımız arasında da yayılmasının əhəmiyyətini qeyd edib, regionlararası əməkdaşlığın münasibətlərdə yeni imkanlar yaradacağına əminliyini bildirib. YAP ilə LDP arasında qurulmuş əməkdaşlıq əlaqələrinin möhkəmlənməsi baxımından qarşılıqlı səfərlərin və dialoqun artırılmasının vacibliyinə diqqət çəkib.
Yaponiya ilə iqtisadi və humanitar sahələrdə əməkdaşlıq imkanları nəzərə alınaraq qarşı tərəfin nümayəndələri, xüsusilə Setaqaya şəhərinin meri Nobuto Hosaka Azərbaycana səfərə dəvət olunub.
Yaponiya xarici işlər nazirinin müavini M.Takizava ilə görüşdə o, cari ilin avqustunda Azərbaycana səfərdən böyük təəssüratlarla qayıtdığını qeyd edib, ölkəmizdə ona göstərilən diqqətə və səmimi münasibətə görə minnətdarlığını bildirib. Xüsusilə Prezident İlham Əliyevlə keçirilən görüşün əhəmiyyətini vurğulayan nazir müavini ölkəmizin inkişafının onda böyük heyrət doğurduğunu deyib. Daha sonra o vurğulayıb ki, Azərbaycanın dövlət başçısı tərəfindən Xətai rayonundakı Heydər Əliyev parkında “Yapon bağı”nın salınması onda məmnunluq doğurub. Qeyd edib ki, Xətai rayonu nümayəndə heyətinin səfəri iki ölkə arasında regionlararası əməkdaşlığın genişləndirilməsi baxımından əhəmiyyətlidir və Yaponiya XİN həmin əlaqələrin inkişafı üçün lazım olan bütün dəstəyi göstərəcək.
LDP-nin xarici əlaqələr bürosunun rəhbəri, parlamentin üzvü K.Tanaka da 2015-ci ilin mayında ölkəmizə uğurlu səfərindən məmnunluğunu bildirib, hakim partiyalar arasında yaranmış dostluq münasibətlərinin daha da gücləndirilməsində maraqlı olduqlarını qeyd edib.
Setaqaya şəhərinin meri N.Hosaka Azərbaycanın ədalətsiz müharibəyə cəlb edilməsinə və ərazilərinin işğal olunmasına baxmayaraq, son illərdəki uğurlu inkişafından xəbərdar olduğunu bildirib. O, Setaqaya şəhəri və Xətai rayonu arasında dostluq münasibətlərinin qurulması məqsədilə qarşılıqlı təbliğatın aparılmasının əhəmiyyətini vurğulayıb. Setaqaya şəhərinin ekologiya məsələlərinə xüsusi diqqət yetirdiyini qeyd edən N.Hosaka Xətai rayonundakı “Ağ şəhər” layihəsinin bu istiqamətdə təcrübə mübadiləsi üçün əhəmiyyətli olacağını bildirib.
Yaponiya parlamentinin müşavirlər palatasının üzvü xanım Akiko Santo Xətai rayonunda salınmış “Yapon bağı”nın qarşılıqlı dostluq münasibətlərinin inkişafına müsbət təsirini qeyd edib, Azərbaycanda yapon mədəniyyətinə göstərilən diqqətə görə minnətdarlığını bildirib. İki dost ölkənin regionları arasında yeni münasibətlərin qurulması təşəbbüsünü alqışlayaraq bu istiqamətdə daim dəstək göstərməyə hazır olduğunu qeyd edib.
Tokio prefekturasının qubernatorunun xarici əlaqələr üzrə müşaviri H.Mizukoşi, Nazirlər Kabinetinin müşaviri N.Okamoto və Yaponiya hökumətinin Cənubi Qafqaz üzrə xüsusi nümayəndəsi Toşihiko Aiki Yaponiya və Azərbaycan arasında hərtərəfli əməkdaşlığın inkişafında maraqlı olduqlarını bildiriblər. Səfər zamanı əldə olunan razılaşmaların həyata keçirilməsinə, Yaponiyanın qabaqcıl təcrübəsinin Azərbaycanda tətbiqinə yardım göstərmək üçün hazır olduqlarını qeyd ediblər.
“Kosugi Zohen Co.LTD” şirkətinin rəhbəri S.Kosuqi bundan sonra da iki ölkə arasında dostluq və əməkdaşlığın daha da güclənməsi, uzunmüddətli tərəfdaşlığın qurulması istiqamətində səylərini əsirgəməyəcəyini vurğulayıb.
Azərbaycanın Yaponiyadakı səfirliyində keçirilən görüş zamanı səfir Gürsel İsmayılzadə Yaponiya ilə əlaqələrin son illər daha da intensivləşdiyini bildirib. Azərbaycanın beynəlxalq tədbirlərin təşkil edildiyi mərkəzə çevrilməsi nəticəsində yaponların da ölkəmizə marağının artdığı, respublikamıza səfərə gələn turistlərin sayının çoxaldığı qeyd edilib, səfirliyin fəaliyyəti barədə məlumat verilib.
Azərbaycan nümayəndə heyətinin rəhbəri Razim Məmmədov Yaponiyadakı səfirliyimizin fəaliyyətinin yüksək səviyyədə qurulduğunu qeyd edib, səfərin təşkilində göstərilən köməyə görə təşəkkürünü bildirib. Vurğulayıb ki, nümayəndə heyətinin Yaponiyaya səfəri səmərəli olub, regionlararası əməkdaşlığı gücləndirmək vəzifəsi uğurla icra edilib.
Nümayəndə heyətinin üzvləri səfirliyin əməkdaşlarına bu gündoğar ölkədəki gələcək fəaliyyətlərində uğurlar arzulayıblar.


Tural




 
Bölməyə aid digər xəbərlər
24.09.2018
Ramil Usubov İranda səfərdədir
24.09.2018
Prokurorluğun yaranmasının 100 illiyinə həsr olunmuş konfrans
24.09.2018
Azərbaycanlı qızlar Süni İntellekt üzrə Təhsil Düşərgəsində iştirak ediblər
24.09.2018
Ehtiyat zabit hazırlığı kursu üçün qəbul elan edilib
24.09.2018
“ADEX-2018” müdafiə sərgisində 29 ölkədən 224 şirkət iştirak edəcək

Şərh əlavə olunmayıb



    ,    
Mehriban Nəsib
Araz Hüseyn
Fuad HÜSEYNZADƏ
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10137

1 Ötən tədris ilində Bakı Atatürk Liseyinin 36 məzunu dünyanın müxtəlif universitetlərinin tələbəsi adını qazanıb
2 “Bu il sığorta bazarı 40 faizdən çox genişlənib, yığımlar artıb”
3 Krivoy Roqdakı soydaşlarımız festivala hazırlaşırlar
4 Yalnızlıq qorxusu
5 “Türkiyə və Azərbaycanla yaxın münasibətlər quran Rusiya Ermənistanın maraqlarına heç bir məhəl qoymur”


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info