Fransa prezidenti kim olacaq-Makron, yoxsa Le Pen?
Tarix: 25.04.2017 | Saat: 00:41:00 | E-mail | Çapa göndər


Fransanın 47 departamentində liderlik edən Le Pen Parisdə cəmi 5 faiz səs toplayıb

Fransanın keçmiş iqtisadiyyat naziri, “İrəli” hərəkatının banisi Emmanuel Makron və “Milli cəbhə” partiyasının lideri Marin Le Pen prezident seçkilərinin ikinci turuna adlayıb. Qaliblər arasında fərq cəmi bir neçə faiz təşkil edib: müvafiq olaraq 23,75 və 21,53 faiz. Seçkidə üçüncü yeri 19,91 faizi səs toplayan “Respublikaçılar” partiyasının namizədi, ölkənin keçmiş baş naziri Fransua Fiyon, sonrakı yeri 19,64 faiz səslə “Fəth olunmamış Fransa” hərəkatının lideri Jan-Lük Melanşon tutub.
İlk turun qalibi Makron seçicilərinə “Avropada güclü Fransa” qurmaq vədi verib. “İki həftədən sonra milliyyətçilərin təhdidi qarşısında sizin, bütün Fransa xalqının, vətənpərvərlərin prezidenti olmaq istəyirəm”, - deyə Makron tərəfdarları qarşısında çıxış edərkən bildirib. Marin Le Pen də öz növbəsində mayın 7-də keçiriləcək seçkilər barədə fikirlərini açıqlayıb. O, seçicilərə müraciətlə deyib: “Sizin qarşınızda çox sadə seçim dayanıb - ya müdafiəsiz, sərhədsiz dövlət, dünya rəqabəti və kütləvi mühacir axınını, ya da bizim iş yerlərimizi, alıcılıq qabiliyyətimizi, təhlükəsizliyimizi və suverenliyimizi qoruyacaq öz sərhədi olan Fransanı seçməlisiniz”. Le Pen artıq öz partiyasının rekordunu yeniləyib - aprelin 23-də o, təxminən 7 milyon fransızın səsini qazanıb. “Milli cəbhə” partiyasının namizədi Fransanın 47 departamentində liderlik edib, Makron isə 42 regionda qələbə qazanıb. Bununla yanaşı, Le Pen Parisdə məğlub olub. Fransa Daxili İşlər Nazirliyinin məlumatına əsasən, orada Le Penə cəmi 5 faiz seçici səs verib. Makron isə əsas rəqiblərini xeyli qabaqlayaraq, paytaxtda 35 faizədək səs yığıb. Seçkilərin birinci turu başa çatdıqdan bir neçə saat sonra paytaxtda qarşıdurmalar yaşanıb, iki nəfər xəsarət alıb. Nümayişçilər avtomobilləri yandırıb, köşkləri aşırıb, reklam konstruksiyalarını sındırıblar. Etirazçılar yalnız gecəyarısı, polis gözyaşardıcı qaz və səs bombalarını işə saldıqdan sonra dağılışıblar. İkinci tur öncəsi siyasətçilərin əksəriyyəti Emmanuel Makronun qələbəsinə inanır. Tərəfdarlarını öz səslərini Makrona verməyə çağıran respublikaçı Fransua Fiyon və sosialist Benua Amonun mövqeyi keçmiş nazirin lehinədir. Fransada prezident seçkilərinin ikinci turu mayın 7-də keçiriləcək. Seçkinin ilk turunu dəyərləndirən Qərb mediası Fransa cəmiyyətinin parçalanmasına xüsusi diqqət ayırıb. Qərb mediası Emmanuel Makronun yanında yer alır. Onlar Fransanı seçkinin ikinci turunda “yaxşı” və “pis” arasında doğru seçim etməyə çağırıblar. Avropadakı siyasi mənzərə ilə bağlı narahatlıqlarını ifadə edən Almaniyanın “Frankfurter Allgemeine Zeitung” nəşri Makronun qələbəsini də çətin qələbə kimi dəyərləndirib: “Fransızların 40 faizindən çoxu sol ifrat və ya sağ namizədlərə səs verib. Makronun az səs çoxluğu ilə qalib gəlməsi, onun qarşıdakı turda qalib gələ biləcəyinə o qədər də zəmanat vermir”. Məqalə müəllifinin fikrincə, baş verənlər Avropa siyasi arenasında radikallaşmanın vüsət almasına dəlalət edir. “Washington Post” nəşri də ölkənin milli kimlik məsələsi üzündən iki düşərgəyə bölündüyünü yazır. Nəşr yazır ki, Fransa tarixində ilk dəfə olaraq, seçicilər sosialist və mühafizəkarların nümayəndəsi deyil, ölkədə dəyişikliklər edəcəyi vədini verən namizədə səs veriblər: “Ölkəni Avropa İttifaqından, NATO-dan çıxaracağına söz verən “Milli Cəbhə” lideri Le Pendən fərqli olaraq, “İrəli” hərəkatının lideri «Kollektiv həmrəyliyə» inam nümayiş etdirərək, Avropa İttifaqını gücləndirməyin tərəfdarı kimi çıxış edir. İsveçrənin “Le Temps” nəşri yazır ki, Fransa cəmiyyətindəki parçalanma ölkə üçün yaxşı hal deyil: “Fransanı “fundamental dəyişikliklər” gözləyir. Yekunda Fransa ya bütün baryerləri aşaraq öz problemləri ilə dünyaya açılmış olacaq, ya da bu problemlər sərhəd daxilində gizlədilmiş olacaq”. ABŞ-ın “Los Angeles Times” nəşri hesab edir ki, Makron-Le Pen mübarizəsinin nəticəsi nəinki Fransanın, həm də Avropa İttifaqının gələcəyini müəyyən edəcək. Britaniyanın “The Guardian” nəşri “İrəli” hərəkatının liderini Fransa üçün “perspektivli şans” kimi dəyərləndirir. İsrailin xəbər saytı olan “Haaretz” isə qeyd edir ki, Le Pen seçkilərdə qalib gələcəyi təqdirdə Fransa polis dövlətinə çevriləcək.
Ağasəf Babayev




 
Bölməyə aid digər xəbərlər
17.02.2019
Londonda Karl Marksın məzarına növbəti dəfə vandal hücumu olub
16.02.2019
Misirdə terror aktı nəticəsində ən azı 15 əsgər həlak olub
16.02.2019
Suriyadan olan 395 qaçqın ötən il Rusiya vətəndaşlığı alıb
16.02.2019
ABŞ-da atışma: xəsarət alanlar var
16.02.2019
Nigeriyada silahlı hücum nəticəsində 60-dan çox dinc sakin həlak olub

Şərh əlavə olunmayıb

    ,    
Namiq Əliyev
Fuad HÜSEYNZADƏ
Tural Tağıyev
Esmira Məmmədova
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10598

1 “Gürcüstanda yaşayan gürcü və azərbaycanlı gənclərin mütəmadi görüşlər keçirməsi vacib şərtdir”
2 “Vzqlyad.ru”: “Nazarbayev və Əliyev türk-islam dünyasının lideri roluna ən aktiv iddiaçılardır”
3 Prezident İlham Əliyevin Real televiziyasına müsahibəsi (Yenilənib)
4 “Əsas oxucu kütləsi sayılan gənclər bu gün internet mediaya daha çox üstünlük verirlər”
5 Qabaqcıl texnologiyalar dövründə ənənəvi və internet medianın inkişafı


© Copyright 1999-2019 "Palitra" müstəqil ictimai-siyasi qəzet
Azərbaycan, Bakı ş. Xətai rayonu, M.Mehdizadə-5, giriş 2
Tel/Fax.: (+99412) 489 08 53
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info