“Şimal axını 2” layihəsi təhlükədə
Tarix: 13.07.2018 | Saat: 21:24:00 | E-mail | Çapa göndər


Ağ Ev iki istiqamətdə Avropaya qarşı sanksiya cəbhəsi açıb: layihənin investoru olan şirkətlərə sanksiyalar tətbiq edə bilər

ABŞ “Şimal axını 2” (“Nord Stream 2”) təbii qaz boru kəməri layihəsinin iştirakçısı olan Qərb şirkətlərinə sanksiyalar tətbiq edə bilər. Bu barədə ABŞ Dövlət Departamentinin rəsmisi məlumat verib. O bildirib ki, Rusiyanın “Şimal axını 2” layihəsinə investisiya qoyan Qərb şirkətlərinin sanksiyalarla qarşı-qarşıya qalma riskləri var. Rəsmi Vaşinqton Rusiya təbii qazını Almaniya üzərindən Avropaya daşıyacaq “Şimal axını 2” boru kəmərini Moskvanın Avropanı bölmək üçün istifadə etdiyini müdafiə edərək, bu boru kəmərini inşa edən şirkətlərə sanksiyalar tətbiq ediləcəyinə dair yenidən xəbərdarlıq edib: “Rusiyanın boru kəməri ilə enerji ixracında çalışan şirkətlərin sanksiya riski daşıyan fəaliyyət həyata keçirdikləri barədə qərarlıyıq. Biz, bu boru kəmərinin Avropanın ümumi enerji təhlükəsizliyi və sabitliyinə mənfi təsir edəcəyinə inanırıq. Rusiya layihənin Avropanı “parçalamaqda” olduğunu başa düşür və bundan öz lehinə istifadə edir”. Qeyd edək ki, beynəlxalq enerji şirkətləri “Wihtershall”, “Uniper”, “OMV”, “Shell” və “Engie” “Şimal axını 2” layihəsinə investisiya yatırıb. “Nord Stream II AG” konsorsiumunun məlumatına görə, “Şimal axını 2” təbii qaz boru kəmərinin inşası üçün hazırlıq işləri Almaniyanın Baltik dənizi sahilindəki Greifswald körfəzində başlanılıb. Marşrut boyunca digər üç ölkədə - Rusiya, İsveç və Danimarkada müvafiq icazələrin alınması prosedurlarına başlanıb. Tikinti işləri nəzərdə tutulduğu kimi, 2018-ci ildə həyata keçiriləcək. Yanvarda Almaniya tərəfindən “Şimal axını 2” qaz boru kəmərinin inşasına dair icazə verilib. “Gazprom” şirkəti “Şimal axını 2” təbii qaz boru kəməri layihəsinin 2019-cu ilin sonunadək başa çatdırılacağını açıqlayıb. Ümumilikdə 9,5 milyard dollara başa gələcək və 1220 kilometr uzunluğundakı “Şimal axını 2” qaz kəməri Baltik dənizindən keçməklə Rusiyadan Almaniyaya ildə 55 milyard kubmetr təbii qaz nəql edəcək. “Gazprom”la yanaşı, “Shell”, “OMV”, “Engie”, “Uniper” və “Wintershall” kimi enerji şirkətləri layihənin əsas tərəfdaşlarındandır. “Şimal axını 2” ilə Rusiyanın Baltik dənizindən keçməklə Almaniyaya təbii qaz ixracı ildə 110 milyard kubmetri keçəcək. Donald Trampın Almaniya ilə bağlı son açıqlamalarından sonra sanksiya məsələsinin gündəmə gələcəyi gözlənilən idi. Tramp açıq şəkildə Almaniyanı təhdid etmişdi. Bunun əsas səbəblərindən biri Almaniyanın Rusiya ilə yaxınlaşması və bu məsələdə Vaşinqtonun qitədə həyata keçirdiyi siyasətə qarşı durmasıdır. Ağ Ev Almaniyanın Vaşinqtondan müstəqil siyasət həyata keçirməsini istəmir və bunun qarşısını almaq üçün təzyiq rıçaqlarını işə salıb. Almaniyanın ABŞ-ın təzyiqlərinə nə qədər dözə biləcəyi bəlli deyil. Çünki Almaniya Avropanın əsas dövlətlərindən biri olsa da, təkbaşına ABŞ-a qarşı duruş gətirə bilməz. Fransa dövlət başçısı Makron bu məsələdə Almaniya ilə həmrəy olduqlarını elan edib. Amma siyasi təcrübə göstərir ki, ABŞ müxtəlif yolla Fransanı bu mövqeyindən daşındıra bilər. Məsələn, Tramp-Makron görüşündə ABŞ-ın Fransanın Avropa İttifaqından çıxmağa təşviq etdiyi məlum olmuşdu. Almaniyanın Rusiya ilə yaxınlaşma siyasəti Donald Trampın seçilməsindən sonra fəal fazaya keçib. Bu ilin əvvəlində Rusiyanın enerji nəhəngi “Gazprom” tərəfindən Almaniya tərəfindən “Şimal axını 2” təbii qaz boru kəmərinin inşasına dair icazə verilməsi ilə bağlı xəbər yayıldı. Elə həmin vaxtdan ABŞ Almaniyanı bu layihədən uzaqlaşdırmağa çalışır. Amma belə görünür ki, ABŞ-Almaniya münasibətlərində yaranan böhran dərinləşəcək. Maraqlıdır ki, ABŞ İran istiqamətində də sanksiya siyasəti həyata keçirir. ABŞ-ın maliyyə naziri Stiven Mnuçin deyib ki, ABŞ bu ölkənin mövqeyinə zidd olaraq, İran neftini almaqda davam edən istənilən ölkəyə, o cümlədən Rusiya, Çin və digər dövlətlərə sanksiya tətbiq etməyə hazırdır. Xatırladaq ki, Donald Tramp mayın 8-də İranın nüvə proqramı sazişindən çıxdığını bəyan edib. O, İrana qarşı bütün sanksiyaların, o cümlədən ikinci dərəcəli, yəni İranla biznes quranlara qarşı da sanksiyaların yenidən tətbiqi barədə məlumat verib. “Altılığın” digər üzvləri ABŞ-ın bu addımına qarşı çıxıblar. Vaşinqtonun Avropadan olan tərəfdaşları İranla sazişə, əvvəlki kimi, riayət etmək fikrində olduqlarını söyləyiblər. Bu dəfə də hədəfdə olan əsas şirkətlər Avropaya aiddir. Ağ Ev iki istiqamətdə Avropaya qarşı sanksiya cəbhəsi açıb.
Anar Miriyev




 
Bölməyə aid digər xəbərlər
20.09.2018
Paşinyanın növbəti iftirası: siyasi imicini itirmiş şoumen
19.09.2018
Pakistan məhkəməsi Nəvaz Şərifin həbsdən buraxılmasına qərar verib
19.09.2018
USAİD Gürcüstanda iqtisadi islahatlar üçün 1,5 milyard dollar ayırıb
19.09.2018
Şimali və Cənubi Koreya arasında hərbi sahədə əməkdaşlıq müqaviləsi imzalanıb
18.09.2018
Çin ABŞ-dan idxal olunan 5200-dən çox məhsulun rüsumunu artırır

Şərh əlavə olunmayıb



    ,    
Mehriban Nəsib
Araz Hüseyn
Fuad HÜSEYNZADƏ
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10123

1 Ötən tədris ilində Bakı Atatürk Liseyinin 36 məzunu dünyanın müxtəlif universitetlərinin tələbəsi adını qazanıb
2 “Bu il sığorta bazarı 40 faizdən çox genişlənib, yığımlar artıb”
3 Krivoy Roqdakı soydaşlarımız festivala hazırlaşırlar
4 “Son 15 il ərzində Azərbaycanda 3 mindən çox məktəb tikilib və əsaslı təmir edilib”
5 Aqil Acalov: “İdmançılar qanvermə aksiyalarında aktiv iştirak edəcəklər”


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info