Van Çen: Azərbaycanın seçdiyi inkişaf yolunu dəstəkləyirik
Tarix: 20.10.2018 | Saat: 12:51:00 | E-mail | Çapa göndər


Tayhu Dünya Mədəniyyət Forumunun illik iclasında iştirak etmək üçün Pekində səfərdə olan Azərbaycan Respublikası Baş nazirinin müavini, Yeni Azərbaycan Partiyası sədrinin müavini–icra katibi Əli Əhmədov Ümumçin Xalq Nümayəndələri Yığıncağının (ÜXNY) sədr müavini Van Çen ilə görüşüb.
AZƏRTAC xəbər verir ki, Çin-Azərbaycan əlaqələrinin bir neçə əsrlik tarixi olduğunu vurğulayan Van Çen müasir dövrdə münasibətlərimizin müxtəlif sahələrdə uğurla inkişaf etdiyini deyib. İki ölkə münasibətlərinin inkişafında yüksək səviyyəli səfərlərin əhəmiyyətini vurğulayan ÜXNY-nin sədr müavini Azərbaycan Prezidenti İlham Əliyevin 2015-ci ildə Çinə səfərinin əlaqələrimizin genişlənməsində və möhkəmlənməsindəki rolunu xüsusi vurğulayıb.
Van Çen Azərbaycanın özü üçün müəyyən etdiyi inkişaf yolunu dəstəklədiklərini bildirərək, ölkəsinin ikitərəfli əlaqələrimizin daha da inkişafı istiqamətində birgə səylərini davam etdirəcəyini bildirib.
O, iki ölkənin qanunverici orqanları arasında mövcud olan əlaqələrdən danışaraq, Milli Məclis sədri Oqtay Əsədovun rəhbərliyi ilə Azərbaycan parlament nümayəndə heyətinin bu yaxınlarda Çinə səfərini xatırladıb.
Tayhu Dünya Mədəniyyət Forumunun illik iclasında iştirak üçün təşəkkür edən ÜXNY-nin sədr müavini ölkələrimizin humanitar və mədəni sahələrdə əlaqələrinin də müxtəlif layihələrlə inkişaf etdirildiyini diqqətə çatdırıb. O, cari il ərzində Çində Azərbaycan musiqisindən ibarət bir neçə konsertin keçirildiyini yada salaraq, bu cür tədbirlərin Azərbaycan mədəniyyətinin Çində tanıdılması baxımından vacibliyini vurğulayıb.
Tayhu Dünya Mədəniyyət Forumunun illik iclasında iştirak üçün dəvətə görə təşəkkürünü bildirən Baş nazirin müavini Əli Əhmədov Azərbaycanın Çin ilə əlaqələrin bütün sahələrdə inkişafına xüsusi əhəmiyyət verdiyini bildirib.
Azərbaycan-Çin əlaqələrinin möhkəm təməllər üzərində qurulduğunu diqqətə çatdıran Ə.Əhmədov tarixi İpək Yolunun xalqlarımız arasında münasibətlərin qurulmasındakı rolunu vurğulayıb.
Hazırda iki ölkə arasında əlaqələri dostluq və qarşılıqlı etimada əsaslanan, dinamik inkişaf edən çoxtərəfli ciddi tərəfdaşlıq münasibətləri kimi səciyyələndirən Ə.Əhmədov yüksək səviyyəli qarşılıqlı səfərlərin əməkdaşlığımızın möhkəmlənməsinə töhfələr verdiyini deyib. Azərbaycan Respublikasının Prezidenti İlham Əliyevin Çin Xalq Respublikasının Sədri Si Cinpinin dəvəti ilə iki dəfə Çində səfərdə olduğunu xatırladan Ə.Əhmədov həmin səfərlər zamanı dövlət başçılarının münasibətlərimizin müxtəlif sahələrdə inkişafı ilə bağlı qəbul etdiyi qərarların uğurla icra edildiyini deyib.
Baş nazirin müavini Çinin “Bir kəmər, bir yol” təşəbbüsünün Azərbaycan-Çin münasibətlərinin daha da genişlənməsi üçün yaxşı imkanlar yaratdığını vurğulayıb, ölkəmizin həmin strategiyanın icrasına hər cür dəstək göstərməyə və bu çərçivədə birgə əməkdaşlığa hazır olduğunu bəyan edib.

X X X

Çin Kommunist Partiyasının nazir statusunda beynəlxalq əlaqələr departamentinin rəhbəri Sun Tao ilə görüşdə hakim partiyalar arasında sıx əməkdaşlığın ölkələrimiz arasında münasibətlərin genişlənməsi baxımından əhəmiyyəti vurğulanıb.
Sun Tao iki ölkənin liderlərinin əlaqələrimizin müxtəlif istiqamətlər üzrə inkişafı ilə bağlı tapşırıqlarının icrası istiqamətində hakim partiyaların da üzərinə vəzifələr düşdüyünü bildirib. O, Çin Kommunist Partiyasının bununla bağlı hər cür əməkdaşlığa hazır olduğunu deyib.
ÇKP rəsmisi Azərbaycanı yaxşı dost kimi gördüklərini, tarixi kökləri olan münasibətlərimizin inkişafı üçün böyük potensialın olduğunu diqqətə çatdırıb.
“Bir kəmər, bir yol” təşəbbüsünün reallaşmasında birgə məsləhətləşmələrin əhəmiyyətinə toxunan Sun Tao bu strategiyanın bütün iştirakçı ölkələrin inkişafına imkan yaradacağına əminliyini ifadə edib. “Coğrafi olaraq Asiya ilə Avropanın qovşağında yerləşən Azərbaycan “Bir kəmər, bir yol” strategiyası üçün vacib ölkədir. Biz Azərbaycanın imkanlarından birgə istifadə etməklə bu layihənin uğurlu icrasına və bununla da xalqlarımızın rifahının daha da yaxşılaşmasına nail ola bilərik”,- deyə departament rəhbəri vurğulayıb.
Dövlət başçılarının səmimi dostluq əlaqələrinin ölkələrimiz arasında münasibətlərin inkişafında əvəzsiz rol oynadığını qeyd edən YAP sədrinin müavini–icra katibi Əli Əhmədov Çin ilə əlaqələrin inkişafının Azərbaycan üçün böyük əhəmiyyət kəsb etdiyini deyib.
Ə.Əhmədov ölkəmizin Çinin “Bir kəmər, bir yol” təşəbbüsünü ilk dəstəkləyən dövlətlərdən olduğunu diqqətə çatdıraraq böyük iqtisadi və nəqliyyat-tranzit imkanlarına malik olan Azərbaycanın bu layihədə oynadığı roldan danışıb. Ötən il istifadəyə verilən və Avropa ilə Çin arasında ən qısa dəmir yolu əlaqəsini təmin edən Bakı-Tbilisi-Qars dəmir yolu xətti İpək yolunun vacib məqami olmaqla yanaşı, “Bir kəmər, bir yol” təşəbbüsünün icrası baxımından böyük addımdır.
Baş nazirin müavini Ə.Əhmədov Ermənistan-Azərbaycan Dağlıq Qarabağ münaqişəsinin həlli məsələsində Azərbaycanın haqlı mövqeyini dəstəklədiyinə görə Çin tərəfinə təşəkkür edib. Bildirib ki, Azərbaycanın da “Vahid Çin” siyasətinə dəstəyi dəyişməyib.
Görüşdə iki ölkə arasında siyasi, iqtisadi, humanitar, mədəni sahələrdə əlaqələrin hazırki vəziyyətinə və inkişaf perspektivlərinə dair fikir mübadiləsi aparılıb.




 
Bölməyə aid digər xəbərlər
19.11.2018
Almaniyadakı azərbaycanlı alimlərin konfransı keçirilib
19.11.2018
İsveçrə Azərbaycanlıları Koordinasiya Şurasının toplantısı keçirilib
19.11.2018
Dövlət Komitəsinin nümayəndə heyətinin Amerikaya səfəri Vaşinqtonda davam edib
19.11.2018
“Azərbaycan dövləti hər zaman diasporun yanındadır”
17.11.2018
İN: Qondarma qurumun ABŞ ərazisində təşviqi bu ölkənin Minsk qrupunun həmsədri kimi öhdəlikləri ilə ziddiyyət təşkil edir

Şərh əlavə olunmayıb



    ,    
Namiq Əliyev
Tural Tağıyev
Namiq Əliyev
Namiq Əliyev
Hansı dövlətləri Azərbaycana dost hesab edirsiniz?
Türkiyə
Rusiya
ABŞ
Almaniya
Fransa
İngiltərə
Gürcüstan
Ukrayna
Belorusiya
İran
Çin

  Nəticələr!    İştirak edənlər: 10500

1 “Xaricdə təhsilimi davam etdirsəm, psixologiya sahəsini seçəcəyəm”
2 Davamli dil siyasəti dövlətin əsas prioritet istiqaməti kimi
3 Rufiz Qonaqov: Bako Saakyanın Fransaya qanunsuz səfəri Minsk qrupunun həmsədri olan bu ölkə üçün qara ləkədir
4 “Gedir dayanmadan zamanın köçü”
5 Almaniyada Naxçıvanla bağlı broşürlər paylanılıb


© Copyright 1999-2013 "Palitra" müstəqil ictimai-siyasi qəzet
Azərbaycan, Bakı ş. Sahib Zeynalov 15/31
Tel/Fax.: 441-39-97, Tel: 449-55-46
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. Designed by inetlab.info